Nel so mensaxe, Guterres calcó en que l'enfoque européu actual pa tratar la situación nun ye'l correctu y, "nel so conxuntu, Europa fracasó n'alcontrar una respuesta común efectiva y la xente sufrió como resultáu d'ello".

   El máximu responsable d'Acnur dexó claro que "ésta ye principalmente una crisis de refuxaos y non un fenómenu migratoriu" puesto que se trata de persones que "fuxen pa salvar les sos vides" y poro merecen que los sos derechos fundamentales se respeten, "independientemente del so estatus llegal".

   De la mesma manera, punxo l'acentu en que "nengún país pue facelo solu y nengún país pue negase a facer la so parte" pa resolver el problema. "La UE ta nun momentu definitoriu y agora nun tien otra elección que movilizar toles sos fuerces sobre esta crisis", añadió.

   "La única manera de resolver esti problema ye que la UE y tolos Estaos miembros apliquen una estratexa común, basada na responsabilidá, la solidaridá y la confianza", defendió Guterres, lo que pasa, según él, por midíes urxentes y valientes pa estabilizar la situación y depués atopar la manera de realmente compartir la responsabilidá a mediu y llargu plazu".

   D'acordies con Guterres, "la UE ha tar dispuesta (...) a poner en marcha una capacidá inmediata y afayaíza de recepción d'emerxencia, asistencia y rexistru". Aquéllos que seyan susceptibles de recibir protección tres la so llegada, "tienen de beneficiase d'un programa de reasentamientu, cola participación obligatoria de tolos Estaos miembru".

200.000 ACOYÍOS

   "Una estimación mui preliminar apuntaría a la potencial necesidá d'aumentar les oportunidaes de reasentamiento hasta les 200.000 places", indicó. Esta cifra ta mui llueñe de la que nesti momentu alderiquen los países europeos d'acoyer a 40.000 refuxaos y tamién de la nueva propuesta que va facer la Comisión Europea la próxima selmana de que seyan 120.000 los refuxaos llegaos a repartir ente los Ventiocho.

   Nesti sen, alvirtió que "esto namás pue funcionar si va de la mano de capacidaes de recepción afayaíces, especialmente en Grecia" anque dexó claro que "la solidaridá nun pue ser la responsabilidá de namás un puñáu d'Estaos miembros".

   Tocantes a los que se compruebe que "nun precisen protección internacional y que nun puen beneficiase d'oportunidaes migratories llegales", Guterres caltuvo que se-yos debería ayudar a volver "rápido a los sos países d'orixe, en plenu respetu de los sos derechos".

   Igualmente, reclamó "una cooperación internacional más efectiva" na llucha contra les mafies que trafiquen con persones pero de forma que se permita que se protexa a les víctimes".

Foto: DIMITRIS MICHALAKIS / REUTERS