Van dar una actuación especial cola formación orixinal a la medianueche del sábadu 19 de setiembre na Plaza Feijoo d'Uviéu

N'abril de 2013 Fala Non Caduca anunció la so disolución tres seis años de trayectoria. Pero cada final siempres tien una puerta abierta y el próximu 19 de setiembre esta banda va volver a abrila. Aprovechando que nes fiestes de San Mateo van tar n’Asturies tolos sos componentes que tuvieron qu'emigrar, decidieron volver a los ensayos pa xubise otra vuelta al escenariu. Van facelo na Plaza Feijoo, como artista convidáu del Concursu de Rock Ciudá d'Uviéu.

Formaos en 2007, Fala Non Caduca foi parte de lo que puede llamase la tercer xeneración del rock n’asturianu. Etiquetaron el so estilu como Mecigayu Son, un amiestu de ska, rock, folk, reggae, punk y metal que dio lluz a tres trabayos: ‘En Llingua Afilada’ (Autoedición, 2008), ), ‘Tiempu De Povisa’ (Algamar Producciones, 2010) y ‘Al Altu La Lleva’ (Algamar Producciones, 2012). El compromisu cola llingua asturiana, la reivindicación nes lletres y un animáu directu fueron otres de les señes d'identidá; razones que los llevaron a pisar los escenarios más destacaos de la so tierra y tar nomaos dos vegaes al Premiu al Meyor Cantar en Llingua Asturiana.

A falta de confirmar pola mesma banda si van retomar l'actividá dafechu, el sábadu 19 de setiembre van xubir de nuevu a un escenariu pa dar un conciertu especial. Los componentes orixinales xuntu al gaiteru recién incorporáu Andresín R. Monteavaro, van repasar los temes más destacaos de Fala Non Caduca. L'actuación va entamar sobre la medianueche na Plaza Feijoo y va tar precedida pola de la bandina folk eo-naviega Caldo y Os Rabizos nuna nueche que va xuntar la música identitaria y les dos llingües autóctones del país.