Madrid (E.P.).-El coordinador federal d'Izquierda Xunida, Cayo Lara, quitó trescendencia a les opiniones del expresidente Felipe González sobre la situación política de Cataluña yá que considera que, al marxe de lo que fuera nel pasáu, güei namás fala como "comisionista de Gas Natural", la empresa participada por La Caixa.

   Nuna carta a los catalanes, Felipe González criticó l'inmovilismu del Gobiernu de Mariano Rajoy y cargó contra la vía independentista, que define como "una aventura illegal y irresponsable que pon en peligru la convivencia ente los catalanes y ente estos y los demás españoles".

   Preguntáu por esti artículu, Cayo Lara tornó a analizalo sorrayando que Felipe González, con independencia de que fuera presidente del Gobiernu nel pasáu, nun tien güei "autoridá" porque actúa "como representante de Gas Natural".

   "Ye un comisionista y empresta los sos servicios en Gas Natural", atayó, asegurando que les palabres del expresidente yá "nun lleguen al cielu". Al so xuiciu, quien tien qu'opinar ye l'actual secretariu xeneral del PSOE, Pedro Sánchez.

   Ye más, recordó que Felipe González ye tamién "unu de los máximos defensores de la gran coalición" ente PP y PSOE, daqué que desaconseya a los socialistes porque, si lo faen, van acabar retiraos de la hestoria.