La economía española medró un 1% nel segundu trimestre del añu, una décima más de lo que lo fixo nel trimestre anterior, gracies al consumu, la inversión y a un meyor comportamientu del sector esterior, según la Contabilidá Nacional Trimestral publicada esti xueves pol Institutu Nacional d'Estadística (INE).

En tasa interañal, el PIB medró un 3,1% nel segundu trimestre, cuatro décimes más que nel trimestre anterior, acelerando la trayeutoria de recuperación qu'entamó na segunda metá de 2013. D'esta forma, el ritmu interañal de medría de la economía española, el mayor dende'l cuartu trimestre de 2007, torna a niveles previos a la crisis.

L'INE esplicó que l'aceleración na variación interañal del PIB ye consecuencia d'una mayor aportación de la demanda nacional (3,3 puntos frente a 3,1 puntos nel trimestre anterior) y d'una menor aportación negativa de la demanda esterna (-0,2 puntos frente a -0,4 puntos nel trimestre previu).

Col repique trimestral del PIB ente abril y xunu encadénense yá ocho trimestres de meyores, mentanto que la tasa interañal atropa siete trimestres en positivu.

Crez el cosumu de les cases

El consumu de les cases amosó nel segundu trimestre del añu una medría trimestral del 1%, tres décimes más que nel trimestre anterior (0,7%), colo que yá suma nueve trimestres consecutivos en positivu. El gastu de les instituciones ensin fines d'arriquecimientu al serviciu de les cases tamién s'aceleró, nesti casu una décima, hasta'l 0,2%.

Frente al mayor consumu de les cases y les instituciones ensin fines d'arriquecimientu, les alministraciones públiques frenaron el so gastu en consumu más d'un puntu, pasando d'una tasa trimestral del 1,7% nel primer trimestre a una medría del 0,4% nel segundu.

La formación bruta de capital fixu, d'otra miente, medró un 2% al respeutive del trimestre anterior, seis décimes más, gracies a la inversión en bienes d'equipu, que dobló la so medría nel segundu trimestre, dende'l 1,6% al 3,2%. La inversión en construcción, a la escontra, se desaceleró dos décimes, dende'l 1,6% del primer trimestre al 1,4% nel segundu.

Nel segundu trimestre del añu, les esportaciones medraron un 1,6%, frente al 0,4% del trimestre anterior, mentanto que les importaciones avanzaron un 2,3%, casi dos puntos más de lo que lo fixeron nel trimestre anterior (0,4%).

El gastu públicu meyora

En tasa interañal, la economía española medró nel segundu trimestre un 3,1%, gracies a la mayor demanda interna y a que la demanda esterna rebaxó la so contribución negativa al PIB. Los dos principales componentes de la demanda nacional, amosaron medríes asemeyaes a los del primer trimestre.

En términos interañales, el consumu de les cases, de les instituciones ensin fines d'arriquecimientu y de les alministraciones públiques rexistraron meyores interañales del 3,5%, del 1,6% y del 1%, respeutivamente.

El consumu de les cases caltúvose al respeutive del trimestre anterior, mentanto que'l de les instituciones ensin fines d'arriquecimientu se desaceleró dos décimes. Namái les alministraciones públiques medraron el so gastu en consumu al respeutive del trimestre anterior, con una tasa interañal ocho décimes penriba de la del primer trimestre (1% frente a 0,2%).

D'otra miente, la inversión rexistró una medría interañal del 6,1%, la mesma que nel trimestre anterior, con un repique de la inversión en construcción del 5,1%, una décima más que nel primer trimestre, mentanto que la inversión en bienes d'equipu se desaceleró cuatro décimes, hasta'l 9,2%.

Les esportaciones pisen l´acelerador

Nel segundu trimestre, la contribución negativa de la demanda esterior neta amenorgóse al respeutive al trimestre anterior, hasta asitiase en -0,2 puntos. Les esportaciones de bienes aceleraron un puntu la so medría interañal, dende'l 5% al 6%, mentanto que les importaciones amontaron dos décimes la so meyora interañal, hasta'l 7,2%.

Dende la óptica de la ufierta, toles cañes d'actividá presentaron nel segundu trimestre un meyor comportamientu interañal que nel primer trimestre.

Asina, el valor amestáu brutu de los servicios medró un 3%, frente a la meyora del 2,7% rexistráu nel trimestre anterior, mentanto que la industria amosó una medría del 3,5% (2,9% nel trimestre anterior), y la construcción ameyoró una décima la so tasa interañal, hasta'l 5,8%. L'agricultura, d'otra miente, amosó una medría del 2,2% tres dos trimestres encadenando tases interañales negatives.

477.000 empleos más nun añu

En cuanto al emplegu, el INE asegura qu'esta variable, midida en términos de puestos de trabayu equivalentes a tiempu completu, medró un 0,9% al respeutive del trimestre anterior, una décima más.

En tasa interañal, l'emplegu rexistró una meyora del 2,9%, una décima más que nel primer trimestre, lo que supón la creación neta averada de 477.000 emplegos equivalentes a tiempu completu nun añu.

Nel segundu trimestre, la ocupación nos servicios medró un 2,4% interañal, tres décimes menos, mentanto que la industria y la construcción aceleraron tres y una décima la meyora de puestos de trabayu, hasta'l 3,7% y el 9,2%, respeutivamente. Mayor que nestos dos sectores foi la meyora vivida pola agricultura, que pasó de destruyir emplegu (-5,5% nel primer trimestre) a crealo (0,4% nel segundu).

Baxa la remuneración de los asalariaos

L'emplegu asalariáu, pela so parte, medró un 3,1% interañal nel segundu trimestre, una décimes más que nel trimestre anterior.

Con ello, la productividá aparente por puestu de trabayu equivalente pasó del -0,1% del primer trimestre al 0,2% nel segundu trimestre, mentanto que la medría de la productividá aparente per hora efectivamente trabayada empeoró cuatro décimes, hasta'l 0,4%.

Nesti contestu, la remuneración de los asalariaos pasó del 4% al 3,3% pol descensu del númberu d'asalariaos (del 3,2% al 3,1%) y pola baxada en 0,6 puntos de la remuneración media por asalariáu (del 0,8% al 0,2%). Asina, la medría del costu llaboral por unidá de productu (CLU) asítiase nel -0,1%, siete décimes menos que la variación esperimentada pol deflactor implícitu de la economía (0,6%).