PEQUÍN, 27 Ago. (EUROPA PRESS) - Les principales bolses asiátiques zarraron la xornada en positivu, dempués d'una selmana d'infartu, na que llegaron a perder más d'un 8% poles duldes sobre la economía china.

   Tres l'actuación del Bancu Central del país, que rebaxó tipos y inyectó lliquidez, paez que la tranquilidá llegó a los parqués asiáticos, polo menos agora.

   La Bolsa de Shanghai, la más importante de China, zarró la sesión con una meyora del 5,4%, hasta los 3.085 puntos, mentanto que la Bolsa de Shenzen, la segunda más relevante del xigante asiáticu, xubió un 3,6%, hasta los 10.248 puntos.

   D'esta miente, l'índiz CSI300, qu'axunta les mayores compañíes cotizaes en Shanghai y Shenzen, zarraba la sesión con ganancies del 5,9%, lo que llevó esti indicador hasta los 3.203 puntos. La Bolsa de Hong Kong, pela so parte, terminó la xornada con una meyora del 2,8%.

   El Nikkei, índiz de referencia de la Bolsa de Tokio (Xapón), l'únicu qu'escapó ayeri de les perdes n'Asia, zarró la sesión con una medría del 1,08%, moderando la meyora del miércoles (+3,2%).

foto REUTERS