Madrí (E.P.).-El Gobiernu nun va aprobar finalmente esti vienres la devolución a los funcionarios d'otru 25% de la paga estraordinaria de 2012, y va dexar esa midida pa futuros conseyos de ministros, según indicó esti miércoles el titular de Facienda, Cristóbal Montoro.

   Anque na so defensa, esti martes, del proyeutu de Presupuestos pa 2016 énte'l Congresu Montoro abrió la puerta a llevar esta midida a la primer xunta del Gabinete tres les vacaciones de branu, que se va celebrar esti vienres, güei dio marcha p'atrás.

   "Non, esti vienres non (vamos aprobala). Veráse nos siguientes conseyos de ministros", retrucó a los medios nos pasiellos del Congresu al entruga-y por esti asuntu, anque ensin fixar cuándo se va dar lluz verde a la midida finalmente.

   La selmana pasada, el secretariu d'Estáu d'Alministraciones Públiques, Antonio Beteta, yá dixo que l'habilitación de creitu pa encarar esti pagu fadríase en setiembre o ochobre, con un costu de 274 millones pal Estáu y de 1.281 millones pal conxuntu de les alministraciones.

EN XINERU, EL RESTU

   Amás, los Presupuestos de 2016 yá recueyen la devolución del 50% restante de la paga estraordinaria --l'otru 25% abonóse-yos na nómina de xineru de 2015-- a los emplegaos públicos a primeros d'añu.

   Esta midida va tener un costu total de 2.562 millones d'euros --547 millones namái al Estáu-- y va ser "básica potestativa", esto ye, que les comunidaes y los conceyos van poder aplicala o non "según los sos planes d'axuste y conforme proceda na negociación coles sos centrales sindicales".

   Xunta la devolución de lo que faltaba de la paga estraordinaria de Navidá, los Presupuestos del añu que vien recueyen tamién una medría retributiva del 1%, la recuperación de los 'moscosos' y los 'canosos' --díes d'asuntos propios-- que se desaniciaren en 2012, y una mayor tasa de reposición nos servicios públicos.