Madrid (E.P.).-  L'actriz María de los Ángeles López Segovia, más conocida como Lina Morgan, finó a los 78 años en Madrid, según informó l'Academia de Cine. El veloriu va abrir a les 16.30 hores d'esti xueves nel teatru de La latina.

   Morgan morrió na so casa de la capital, la ciudá que la vio nacer el 20 de marzu de 1937. Fía d'un xastre y una ama de casa, empezó a llabrase una carrera como artista dende bien pequeña. Ello ye qu'a los 11 años al terminar la educación primaria empezó a estudiar baille clásicu español.

   Foi Pepe Cabo, representante del mundu del espectáculu, quien punxo los sos güeyos nella cuando cumpliera 13 años pa pasar a formar parte d'una compañía infantil,'Los chavalillos de España' . Ehí empezó la relación cola interpretación de Morgan, qu'entós desconocía que pasaría la mayor parte de la so vida faciendo rir a les families españoles.

   Según esplica l'Academia del Cine, tuvo ésitos "grandísimos" en cine, teatru y televisión, mediu al que se dedicó en cuerpu y alma los últimos años de la so trayectoria artística.

   Al integrase na compañía de revistes Colsada a los 16 años, empezó a trabayar como baillarina del repartu de la vedette Maruja Tomás. Llegó a falsificar la so fecha de nacencia pa ingresar nel cuerpu de baille. En 1956 ufiertóse-y sustituyir a Mercedes Llofriu, momentu nel qu'adopta'l seudónimu Lina Morgan.

   L'Academia esplica que corría la metá de la década de los cincuenta y Lina Morgan, yá como vedette de revista, trabayó con Tony Leblanc, Manolo Paso o Miguel Gila. Miráronla pal cine y dio los sos primeros pasos nel celuloide al pie d'un Leblanc director (El pobre García), Jess Franco (Vampiresas 1930) y Rafael J. Salvia (Una tal Dulcinea). Tamién foi la inolvidable Mari Loli en Las que tienen que servir -secundaria de luxu nuna producción na que compartió plantel con Concha Velasco, Amparo Soler Leal, Manolo Gómez Bur, Alfredo Landa y José Sazatornil-.

ESTRELLA DE LA COMEDIA NEL CINE DE LOS 70

   Les sos apaiciones en dellos Estudiu 1 -La chica del gato y El landó de seis caballos- fixeron que fuera riquida como protagonista na pantaya grande. Soltera y madre en la vida (1969) y La tonta del bote (1970) fueron los títulos nos qu'empezó a atalantar que Lina Morgan convirtióse nuna cómica de les de siempre, querida y siguida por tola familia.

   Empezaba tamién a dibuxar el rol qu'asumiría en munches de les producciones de la so biografía artística: "el sempiternu personaxe de muyer inculta capaz de revolver situaciones complicaes gracies a la so intuición y a una chancia de corte caricaturesca y esterotipada", como reza'l Diccionariu de Cine Español, editáu pola Academia de Cine y empobináu por José Luis Borau.

   A partir de los setenta tuvo n'ocho comedies empobinaes por Mariano Ozores onde siguió esplotando les fórmules d'humor que la llevaren al ésitu. En 1975, añu de la muerte de Franco, despidióse de la pantaya grande dirixida por Rafael Romero Marchent n'Un día con Sergio. Sorprendentemente, veinte años dempués, volvió al mundu del celuloide con Hermana, ¿pero qué hiciste, de Pedro Masó. Acompañada de Tote García Ortega y José Manuel Cervino, interpretó a una monxa atracadora de bancu y a la so hermana ximielga.

TEATRU Y TELEVISIÓN

   En 1978 arrienda cola ayuda del so hermanu, l'empresariu José Luis López Segovia, el Teatru La Latina de Madrid, símbolu emblemáticu de les tables nel so barriu. Cinco año dempués, mércalu por 127 millones de pesetes al so antiguu propietariu, Matías Colsada. Los sos ésitos ente caxes llevaron a TVE a rodar versiones de delles de les sos obres pa la pequeña pantaya: Vaya par de gemelas, Celeste no es un color y El último tranvía.

   En 1994 foi unu de los fichaxes estrella d'Antena 3 pa la serie Compuesta y sin novio. Tres esti serial, volvió a la cadena pública de la mano de Valerio Lazarov n'Hostal Royal Manzanares, serie que nun dexó de collechar ésitos en cuatro temporaes axuntando frente a la televisión nel so últimu episodiu a 7.332.000 espectadores.

   Tres esti ésitu cuasi ensin precedentes de la ficción española, Morgan embárcase n'otres producciones televisives que nun tuvieron tantu percorríu, como Una de dos, Academia de baile Gloria y ¿Se puede? Foi retirándose del que fuera'l so oficiu adulces, apaeciendo esporádicamente en series como Aquí no hay quien viva, A tortas con la vida o Escenas de matrimonio.

   Caltuvo la propiedá del Teatru La Latina hasta xunu de 2010, mes nel que se decidió a vendelu al grupu catalán Focus por 7'5 millones d'euros, un despachu y un palcu pa tola vida nel templu de la escena al que tantos años dedicara.

   En vida foi una personalidá artística mui reconocida recoyendo galardones como'l Fotogrames de Plata, tres TP d'Oru, l'Antena d'Oru de Teatru, un Premiu Ondes, el Miguel Mihura, la Medaya d'Oru al Méritu nel Trabayu y la Medaya d'Oru al Méritu nes Belles Artes.

FOTO: GETTY