Les aerollinies de baxu costu tresportaron 20,16 millones de pasaxeros nos siete primeros meses del añu, lo que supón una medría del 9,7% al respeutive del mesmu periodu del exerciciu anterior, atropando'l 49,4% del tráficu aereu de pasaxeros con orixe o destín a España, según datos espublizaos pola Subdireición Xeneral de Conocencia y Estudios Turísticos, dependiente del Ministeriu d'Industria, Enerxía y Turismu.

Pela contra, les compañíes tradicionales treslladaron a más de 20,63 millones de viaxeros hasta xunetu, un 1,6% más qu'un añu antes, atropando'l 50,6% del tráficu aereu de pasaxeros nos siete primeros meses.

En xunetu, les compañíes de baxu costu medraron un 7,9% los sos viaxeros, hasta superar los 4,29 millones de pasaxeros, el 50,7% del total del tráficu aereu del mes, que medró a nivel global --sumando les aereollinies 'low cost' y tradicionales-- un 5,3%, hasta los 8,46 millones de viaxeros.

Pela so parte, nel séptimu mes del añu, les tradicionales atroparon el 49,3% del total de pasaxeros. Les compañíes tradicionales rexistraron medríes muncho más moderaes nestos siete meses.

El 80% del total del fluxu aéreo vieno de la Xunión Europea, con una medría del 6,2%, frente al restu (20%), qu'esperimentó una medría del 2,5%.

Reinu Xuníu y Italaia, principales mercaos 

Por mercaos, el Reinu Xuníu y Italia lideren les entraes en compañíes de baxu costu hasta xunetu, con un 35,8% y un 12% de los pasaxeros qu'escoyeron esti tipu d'aereollinies, respeutivamente, y medríes del 4% nel casu del mercáu británicu (7,2 millones de viaxeros), y del 18,7% nel mercáu italianu (2,4 millones).

Alemaña, tercer emisor, medró un 11,2% les llegaes hasta 2,23 millones de viaxeros, l'equivalente al 11,1% del total de les entraes per esta vía. Siguiólu Francia, col 8,6% del total y 1,74 millones de pasaxeros, un 19,5% más que va un añu.

Ryanair, easyJet y Vueling atroparon el 34% de los pasaxeros que volaron en dalguna compañía de baxu costu en xunetu y el 66% del total del fluxu aéreo internacional que llegó a España per esta vía. Los tres mostraron una evolución creciente, destacando un mes más la medría de Vueling.