Uviéu (E.P.).-  Los diputaos de Podemos na Xunta Xeneral presentaron esti xueves alegaciones al proyectu del AVE previstu pal tramu ente La Pola (L.lena) y Uviéu. Ye, al so xuiciu, una inversión "que namás beneficiaría a los sectores ricos de la población", y por ello defenden destinar esa inversión a la meyora de la rede de cercaníes.

   Nunes declaraciones remitíes pol partíu, tres presentar les alegaciones nel Rexistru Central del Principáu d'Asturies, la responsable de la estaya de Mediu Ambiente del Conseyu Ciudadanu de Podemos, Beatriz González, esplicó que les sos alegaciones sofítense nos impactos de l'alta velocidá, los riesgos xeolóxicos que conlleva y l'impactu socioeconómicu.

   Les llinies d'AVE, aseguró González, "nun son rentables" n'España, polo que siguir cola so construcción sedría pa Podemos "siguir nel mesmu erru". "Nun se pue escaecer que l'aforru de tiempu plantegáu nes alternatives varia ente los 5 y los 8 minutos", recordó. Pa la formación liderada por Emilio León, una inversión de más de mil millones d'euros "nun tendría sentíu" pa un aforru de tiempu "tan mínimu".

   Pela so parte'l diputáu de Podemos  na Xunta Xeneral Héctor Piernavieja calificó la inversión de "despropósitu" y aseguró qu'amuesa una "falta clara de proyectu de país n'España". "Ye fundamental que s'invierta nun modelu muncho más harmónicu y integrador del territoriu asturianu", defendió.

   Asina, aseguró que la inversión prevista pa esti tramu vendría "perfectamente" pa meyorar la rede de cercaníes y la del tresporte de mercancíes.