Madrid (E.P.).-El PSOE va denunciar ante la Fiscalía Xeneral del Estáu al ministru del Interior, Jorge Fernández Díaz porque ve "indicios de delitu" na xunta que caltuvo en sede oficial col ex vicepresidente del Gobiernu Rodrigo Rato, investigáu por corrupción.

   Asina lo anunció esti xueves la vocera del Comité Electoral y secretaria de Ciencia, Participación y Política en Rede del PSOE, María González Veracruz, nuna entrevista en RNE recoyida per Europa Press.

   Pa los socialistes, el ministru incurrió en delitos de prevaricación, de revelación de secretos y d'omisión del deber de torgar delitos al entrevistase col expresidente de Bankia, imputáu pol casu xudicial qu'investiga a exconseyeros de la entidá.

    Tres conocese la xunta, que tuvo llugar el pasáu 29 de xunetu en sede ministerial, el ministru pidió comparecer nel Congresu los Diputaos pa dar esplicaciones. Esa comparecencia, pidida por dellos grupos de la oposición, fadráse mañana a partir de les 9:30 hores na Cámara baxa.

   Sicasí, el PSOE cree que "en paralelo a les responsabilidaes polítiques", la Fiscalía tien qu'investigar "a fondo" esta "xunta de la vergoña".