Madrid (E.P.).-El voceru del PSOE nel Senáu, Óscar López, conseña que la próxima llexislatura va a aldericase "muncho" nel Parlamentu porque yá nun habrá mayoríes absolutes y nun cierra nengún escenariu de pautos poselectorales, nin un pautu de gobiernu que nun incluya al partíu más votáu, y ye que, según recuerda, España ye un sistema parlamentariu, non presidencialista, y habrá que "saber interpretar" el resultáu de les urnes.

   "Tamos nun sistema parlamentariu onde les fuerces polítiques tienen que llegar a pautos --conseña--. Quien manda ye la xente y esto de les mayoríes absolutes yá nun se lleva. Lo que nos piden ye que haya pautos ente les fuerces polítiques".

   Nuna entrevista con Europa Press, nun quier adelantar acontecimientos porque "los resultaos interprétense cuando se producen y agora nun se sabe lo que van dicir los ciudadanos". Tamién refuga la táctica del PP de "desllexitimar" los pautos, cuando ellos tuvieron que usalos en munches comunidaes.    

RAJOY LLEVA CUATRO AÑOS ENSIN FALAR CON NAIDE

   El dirixente socialista opina que, "con independencia de los gobiernos que se formen, va haber que falar, y muncho, la próxima llexislatura", y eso "ye bueno y sano". "Nestos cuatro años Rajoy nun faló con naide --amestó--. Gobernó solo y contra toos, y eso los ciudadanos van refugalo".

   Lo que sí conseñó ye que nes próximes xenerales "el PSOE presentaráse solu, coles mesmes sigles d'hai más de 140 años, y pa ganar y gobernar", mientres que "otros tán pensando en sigles, coaliciones y semeyes".

   Nesi contestu, conseña que Podemos comparte col PSOE "una visión d'una cierta denuncia social" pola xestión del PP nestos años de crisis, pero amiesta que los socialistes representen "un partíu socialdemócrata de gobiernu, con tradición y un posu ideolóxicu que sabe lo que quier y áu va, con idees clares y un ADN qu'amosar", mientres que'l partíu moráu "nunos sitios ye Ganemos y  n'otros nun sabemos".

   López niega qu'afecten al PSOE les polémiques que puean sufrir les llistes de Podemos que llegaron al poder municipal tres les eleiciones de mayu. "Si'l PSOE fuera en coalición, podría influyir, pero'l PSOE va solu --contesta--. El PSOE namás ye responsable de lo que fai'l PSOE, y a muncha honra, y en Madrid nun ta nel Gobiernu, mientres que  n'Andalucía gobierna con votu de Ciudadanos y en Castiella La Mancha col de Podemos, pero siempre con gobiernu socialista".

   En cualquier casu, el senador socialista y ex secretariu d'Organización del PSOE ta "mui enfotáu" nes opciones de Pedro Sánchez nes próximes eleiciones xenerales, pues cree que ye "el líder meyor valoráu" y el "candidatu preferíu pa ser presidente del Gobiernu". "Y eso tendrá traducción en votos", sostién.

SÁNCHEZ TIEN MUNCHU PERCORRÍU

   Anque anguaño "hai más partíos políticos nes eleiciones" y yá nun hai porcentaxes de votu del 40%, Óscar López ta "convencíu dafechu" de que'l líder del PSOE va ser presidente del Gobiernu. "Pedro Sánchez entamó un camín y tien munchu percorríu, y van ser un camín d'ésitos pal PSOE --asegura--. Tien cuerda pa tiempu, va siguir siendo'l líder d'esti partíu y el presidente del país".

   En cuanto a los partíos emerxentes, cree que les empreses d'encuestes son víctimes d'una estratexa de "péndulu", porque nel so momentu infravaloraron les posibilidaes de Podemos y Ciudadanos ante les europees de 2014 y, dende aquella, tán nel llau contrariu y sobrevalórenlos, apurriéndo-yos nes municipales más sofitu del que realmente algamaron.

   En tou casu, cree qu'hai que ser "comprensivos" cola xera de les encuestadores porque tamos en "un momentu mui difícil" pa interpretar los datos porque partíos como Podemos o Ciudadanos entá nun tienen recuerdu de votu col que facer estimaciones con vistes a les xenerales. "Agora nun ye fácil facer encuestes", opina