Madrid (E.P.).-  El 'Día Mundial de la Mocedá' celébrase esti miércoles, 12 d'agostu, nun escenariu n'España onde'l paru mozu (del 49,6% según l'últimu Eurostat), la crisis económica y les torgues pa emancipase y desendolcar un proyectu de vida, son los principales pilancos que tienen que pasar los que quieren cruzar a la vida adulta.

   Según conseñó a Europa Press el presidente del Conseyu de la Mocedá d'España (CJE), Héctor Sanz, pese a que la ONU propunxo como tema de la efeméride d'esti añu la "participación cívica" de los mozos na sociedá, al so xuiciu, nel casu d'España "la prioridá ye la cuestión socioeconómica". "Respetamos muncho la temática de la ONU, pero creemos que n'España tenemos otres urxencies", afirmó.

   Asina, xulga que la principal esmolición de la organización y de la población mozo ye, per un llau, el desemplegu, y, per otru, que "munchos de los que tienen trabayu tienen un emplegu precariu que tampoco los dexa emancipase y facer un plan de vida". "Nun tenemos emplegu y cuando lu tenemos nun nos llega pa comprar una vivienda", llamentó.

   Nesti sen, según l'avance de resultaos del últimu barómetru del CIS (xunetu de 2015), asoleyáu esti miércoles, pa la población de 18 a 34 años la sensación ye que la situación económica anguaño ye básicamente "mala" (43,75%) o "mui mala" (26,5%), anque un 34,5% confía en que meyore nel plazu d'un añu, mientres qu'un 13,8% espera qu'empeore y un 43%, que se caltenga igual.

   Amás, la visión más estendida ente'l colectivu sobre la so situación económica particular ye que tienen una situación económica "regular" (44,1%), o, pa un 26,65%, "mala" o "mui mala".

   Asina según los datos del estudiu, un 6,4% tien unos ingresos más baxos de 601 euros, un 6,2% cobra ente 601 y 900 euros, y un 16,65% tien unos ingresos d'ente 901 euros y 1.200 euros (29,4% tien unos ingresos más baxos a esta cifra). Llueu, hai un 13,7% que cobra ente 1.201 y 1.800 euros y un 20,5% con un nivel d'ingresos ente 1.800 y 4.500 euros.

DOS DE CADA DIEZ NUN PUEN EMANCIPASE

   Nesti sen, Sanz conseñó que la edá media d'emancipación n'España ye de 28 años, cuando n'otros países europeos los mozos salen de casa muncho enantes.

   Amás, recordó que, según l'últimu estudiu del Observatoriu de la Emancipación del CJE (datos de 2014), namás dos de cada diez mozos n'España puen emancipase enantes de los 30 años y alredor de 200.000 emigraron fuera del país desque entamó la crisis, hasta finales del añu pasáu.

   Precisamente, Sanz conseñó la "migración forzosa" a la que, según esplicó, vense obligaos munchos mozos al acabar el so periodu de formación y nun atopar un puestu de trabayu. "Nun me refiero a aquellos que salen d'España pa meyorar el so aprendizaxe, sinón a aquellos que se ven forzaos a colar porque equí nun atopen trabayu", matizó.

   Asina, llamentó que munchos d'estos mozos "tán preparaos" y tienen formación universitaria pero, al nun haber puestos de trabayu pa ellos nel país, "acaben por dir p'Alemania o a otros países y el so trabayu contribúi al PIB y al sistema públicu d'esos países envede al  español".

   "Esti ye ún de los retos, algamar que los mozos nun tengan que colar y que los que marcharon puean volver --espresó--. Munchos d'estos mozos ficieron un esfuerzu pa preparase y tán dispuestos a trabayar per debaxo de la so cualificación si fai falta, pero en dalgún momentu tienen que poder atopar un trabayu que los dexe desendolcar un plan de vida".

   Nesti sen, l'informe d'Eurostat del pasáu mes de xunu allugaba a España como'l país con mayor nivel de paru mozu (menores de 25 años) de la UE, con un 49,6%, a falta de conocer los datos d'emplegu de Grecia. Según esti informe, en xunu yeren un total de 775.000 mozos españoles menores de 25 años los que buscaben trabayu ensin atopalu.

   Acordies colos datos del CIS de xunetu, pa los mozos d'ente 18 y 34 años, el paru (66,5%) y los problemes económicos (29,35%) son los principales retos a los que s'enfrenta la sociedá, xunto cola corrupción y el fraude (45,5%).

   Cuando se trata d'ellos mesmos, ente los problemes que conseñen incluyen tamién ente los más destacaos la educación (16,6), la calidá del emplegu (11,5) y los problemes "de tema social" (7,8%), amás de los anteriores.

   Pese a ello, esti informe conseña que, aproximadamente ún de cada diez mozos d'ente 18 y 34 años (13,4%) declárase "feliz dafechu" y un porcentaxe del 65,45% asegura tener un nivel de "felicidá" d'ente 7 y 9 puntos nuna escala de diez, anque son los más mozos (d'ente 18 y 24 años) los que tienen un mayor porcentaxe de respuestes nesta franxa (69,5%).

HONRADEZ, TOLERANCIA Y AMISTÁ

   L'estudiu conseña tamién que, no que cinca a les preferencies y valores de los mozos, estos señalen hacia una sociedá "plural" en cuanto a oríxenes, cultures y relixones como la más "deseable", nun porcentaxe superior al de los sos mayores (un 63,3% señala esta opción frente a la media del 52,4%).

   Amás, consideren que la honradez (25,9%), la tolerancia y el respetu (24,7%), la disciplina (9,7%) y el sentíu de la xusticia (8,5%) son les virtúes más importantes pa que la convivencia en sociedá seya buena.

   Xunto con estos valores, una investigación del Centru Reina Sofía d'Adolescencia y Mocedá asoleyáu'l pasáu mes d'abril conseñaba que, ente los mozos de 15 y 24 años, led prioridaes más destacaes son "tener persones nes que confiar" (8,71 sobre 10), "tener buenes rellaciones familiares" (8,67), "ganar dineru" (8,51) y "tener ésitu nel trabayu" (8,48), tener una "vida sexual bona" (8,08) y algamar una "buena capacitación cultural y profesional" (8,04).

PARTICIPACIÓN NA SOCIEDÁ

   La celebración del 'Día Internacional de la Mocedá' esti añu vien marcada pola cuestión de la participación cívica de los mozos na sociedá a tolos niveles, según la propuesta de la ONU por mor de la efeméride.

   Según l'organismu internacional, ye "perimportante" algamar que los mozos participen y se comprometan nos estremaos ámbitos de la vida en sociedá col envís de "algamar el desendolcu humanu sostenible".

   Nesti sen, la implicación de los mozos n'ámbitos sociales como la política o les ONG y organizaciones del tercer sector ye entá una actitú minoritaria ente esti colectivu, en comparanza coles franxes d'edá superiores.

   Asina, por exemplu, un estudiu de la Plataforma del Voluntariáu n'España con datos de 2014 cifra nun 16,4% el porcentaxe de mozos d'hasta 24 años que collaboren con una ONG, y nun 18,1%, ente los 25 y los 34 años.

   Esta proporción contrasta cola que presenten tramos d'edá superior, como les persones de 35 a 44 años (25,5%), los de 45 a 54 años (34,5%) o les persones de 55 a 64 años (40,8%).

   En cuanto a les sos posiciones polítiques, el barómetru del CIS de xunetu conseña que los mozos allíniense,sobre manera, a la izquierda (una media de 4,33 nun espectru onde 1 ye izquierda y 10 derecha), anque'l nuedu mayor (24,5%) allúgase nel centru (5).

   Pese a que, según un estudiu del Centru Reina Sofía, un 41,4% de los mozos de 18 a 25 años tán "abondo" o "mui interesaos" no que cinca a la política, el mesmu informe conseña que'l 76,8% nun pertenecen a nengún partíu nin tán interesaos en facelo.

   Per último, en materia relixosa, poco más de la metá (54,65%) declárase creyente de dalguna relixón, sobre manera la católica (51,55%), anque la mayor parte de los mozos (74,95%) nun va  a oficios o ceremonies relixoses "cuasi nunca" a menos que seya una ceremonia del tipu boda, bautismu, funeral o asemeyao.

FOTO: Foto: EMETERIO SUÁREZ GUERRA