El voceru d'Interior del Grupu Popular nel Congresu, Francisco Márquez, dixo esti martes que'l discutiniu que se xeneró arriendes de conocese la xunta que caltuvo'l ministru del Interior, Jorge Fernández Díaz, col exvicepresidente del Gobiernu Rodrigo Rato respuende a la "pseudo-histeria na que dellos partíos políticos yá entraron cola cercanía" de les próximes eleiciones xenerales.

"Creo qu'esti discutiniu respuende al branu y sobre manera creo que se saca y vase a siguir sacando de quiciu cualquier cosa que puea ser criticable", señaló nuna entrevista en La Mañana de COPE recoyida por Europa Press.

Márquez defendió que'l ministru yá dio toles esplicaciones sobre l'alcuentru que caltuvo col imputáu por presuntos delitos fiscales y de blanquéu que tuvo llugar el pasáu 29 de xunetu na sede del so departamentu: "Yo creo que les esplicaciones realmente tán yá daes. Agora lo que quieren los grupos políticos ye que'l show' siga", apuntó.

Na so opinión, "dir más allá ye un exerciciu d'histeria política" y, por esti motivu, criticó que dellos partíos de la oposición llegaren a pidir la dimisión del ministru y inclusive del presidente del Gobiernu, Mariano Rajoy, por esti asuntu.

Esti llunes Interior unvió un comunicáu nel qu'aseguraba que Fernández Díaz nun fexo xestión dala en rellación a la situación procesal de Rodrigo Rato tres la entrevista col expresidente de Bankia y que la xunta foi "puramente personal".

Seya como fuere, énte los pidimientos de comparecencia nel Congresu de dellos partíos políticos tres conocese la xunta, el 'popular' dixo que nun-y estrañaría que Fernández Díaz llegare yá que, al so xuiciu, "esplícase perbién y enforma". Eso sí, solliñó que'l comunicáu al traviés d'Interior ye "más qu'abondo" porque l'alcuentru "nun tien la gravedá que dalgunos-y quixeron dar".

Márquez insistió en que'l partíu de so nun caltien denguna rellación con Rato dende'l puntu de vista políticu "más allá de lo personal".