L’espaciu autoxestionáu de la izquierda soberanista asturiana n’Uviéu entama delles actividaes nesta última selmana de xunetu

L’Espaciu La Llegra continúa coles actividaes nel llar asitiáu na cai d’El Postigu Baxu d’Uviéu. Esti martes 28 a les 19.30 va tener llugar una proyección y charra con xente de la Plataforma de Support de Can Vies, históricu Centru Social Okupáu barcelonés desagospiáu l’añu pasáu. Amás, el sábadu 1 d’agostu va cellebrase la II Parrillada de La Llegra nel Prau Los Riegos de Noreña. Con precios populares, xuegos tradicionales, ambiente folixeru y opción vegana; la parrillada entamará a les 12.30 y p’apuntase namás hai qu’avisar a espaciulallegra@gmail.com.

Per último, La Llegra entama una campaña de socies y socios con cuotes mensuales que van dende la voluntá a los 20 euros. L’oxetivu ye algamar l’autoxestión del espaciu y pa ello La Llegra unvía esti comunicáu col qu’algamar sofitos al so proyectu políticu, cultural y social:

“Yá son dellos meses dende qu’entamamos a abrir espaciu, y nesti tiempu yá foron posibles nél actividaes culturales, reivindicatives, folixeres… texendo redes nel barriu y nel conceyu.

Unos meses depués del Crowdfunding, tornamos a pidir la vuesa collaboración pa siguir faciendo posible un espaciu físicu xunitariu de la izquierda soberanista n’Uviéu, mediante una campaña de socies y socios que tamos entamando. L’oxetivu nun ye otru qu’algamar un colchón económicu que faiga más afayaízu’l trabayu diariu nun llocal abiertu a quien quiera usalu, y que como cualquier otru, xenera unos gastos fixos mensuales.

La Llegra ye un espaciu físicu, pero tamién un espaciu políticu y de xuntanza de persones de munches sensibilidaes polítiques y sociales, que nun llenda’l so llabor a un simple llocal: la dinamización de bloques soberanistes nes manifestaciones, la participación n’actividaes autoxestionaes nel barriu, o’l trabayu de confluencia n’espacios como Asturies en Pie, son dalgunes de les pates d’esi otru llabor que fae posible La Llegra, siempre col enfotu y l'oxetivu firme de dar forma, construyir y afitar un movimientu soberanista con capacidá pa tresformar esti país y algamar una Asturies llibre de tou tipu d'opresión, onde les asturianes puedan vivir dignamente.

Un espaciu de toes y toos namái ye posible cola participación de toes y toos: na organización de les actividaes diaries, n’asistencia a les programaes, nel acondicionamientu del llocal… y tamién nel sofitu económicu. Les cuotes que proponemos dende La Llegra axústense a les distintes realidaes económiques qu’hai n’Asturies: dende 5 €, 10 €, 20 €, o la voluntá.