Hasta 900 persones resultaron deteníes nes redaes realizaes nos últimos díes en territoriu turcu pola so presunta relación col grupu yihadista Estáu Islámicu, cola guerrilla curda Partíu de los Trabayadores del Kurdistán (PKK) y el grupu de ultraizquierda Frente-Partíu de Lliberación Popular Revolucionariu (DHKP-C), según una fonte oficial turca citada por Reuters.

   Hasta'l domingu detúvose a 851 persones, según informó l'axencia de noticies oficial turca, Anatolia, citando fontes policiales. Los deteníos tán acusaos de pertenencia a organización terrorista, d'ataques a les fuerces de seguridá y de participar en manifestaciones illegales.

   Les detenciones empezaron el vienres en tol país, tres la muerte d'ocho miembros de les fuerces de seguridá n'atentaos y ataques cometíos dende'l 20 de xunetu en cinco provincies del sureste de Turquía de mayoría curda. Dalgunos d'estos ataques reivindicólos el PKK.

   L'últimu muertu foi un policía abatíu a tiros n'Istambul cuando participaba nuna detención nel barriu de Gazi. L'axente recibió un tiru nel pechu cuando intentaba disolver a un grupu perteneciente a una "organización illegal" y que, según la versión oficial turca, bloquiara una cai p'atacar a los policíes con palos, piedres y cócteles molotov.

   Namás n'Istambul hai más d'un centenar de deteníos, incluyíos polo menos 37 estranxeros, y un individuu perteneciente a Estáu Islámicu conocíu pol pseudónimu 'Abú Hanzala'. Na redada confiscáronse pistoles, munición, esplosivos caseros, machetes, fueos artificiales y bombes incendiaries.

Foto: OSMAN ORSAL / REUTERS