L'equipu de científicos qu'analiza los cuatro años de datos recoyíos pola misión Kepler de la NASA especialista na busca de planetes fuera del Sistema Solar, llanzó un nuevu catálogu de posibles mundos. Estos rexistros sumaríen más de 500 nuevos planetes a los 4.175 que yá rexistró'l reconocíu telescopiu espacial.

   "Esti catálogu contién el primer analís de tolos datos de Kepler, según la so evaluación automatizada. Va valir pa que los astrónomos puean determinar meyor el númberu de planetes pequeños y fríos, los meyores candidatos p'acoyer vida", esplicó unu de los responsables d'esti trabayu, Jeffrey Coughlin, del Institutu SETI.

   Los espertos destacaron que la nueva llista inclúi 12 candidatos que tienen menos de dos veces el diámetru de la Tierra, orbitando na llamada zona habitable de la so estrella. Esta zona ye'l rangu de distancies a les que'l fluxu d'enerxía de la estrella permitiría qu'exista agua líquido na superficie del planeta y, poro, la vida.

UN CANDIDATU A 'TIERRA'

   D'estos candidatos, Kepler-452b ye'l primeru en confirmase como un planeta. A una distancia de 1.400 años lluz, Kepler-452b acompaña una estrella de característiques bien asemeyaes al Sol: ye un 4 por cientu más masivu y un 10 por cientu más brillosu. Kepler-452b orbita la so estrella a la mesma alloña que la Tierra xira alredor del Sol

   "Esti nuevu mundu llévanos un pasu más cerca d'entender cuántos planetes habitables tán ehí fuera", indicó otru de los participantes nel estudiu, Jose Twicken.

   Kepler 452b tien la oportunidá de ser un mundu rocosu (como la Tierra), teniendo en cuenta'l so tamañu y el tipu d'estrella qu'orbita. Pertenez asina a una clase de planetes que s'alcuentren ente'l tamañu de la Tierra y Neptuno. Magar qu'estos son el tipu más abondosu de mundos descubiertos por Kepler.

   Tocantes a la so estrella, anque ye asmeyada en tamañu y rellumu al Sol, tien 1,5 mil millones años más. Esti oxetu pue dar pistes a los astrónomos sobre cómo pue ser el futuru del Sol y, coles mesmes, de la Tierra.

   "Si ye cierto que'l planeta ye predresu, la so ubicación vis-à-vis cola so estrella podría significar que ta entrando nuna fase d'efectu ivernaderu esbocáu de la so historia climática", esplicaron los espertos. Al so xuiciu, l'aumentu de la enerxía del so sol, de resultes del so avieyamientu, podría calecer la superficie y evaporar cualquier posible océanu na so superficie.

   "Kepler 452b podría tar esperimentando agora lo que na Tierra va pasar dientro de más de mil millones d'años", acabaron.

Foto: NASA.