El númberu unu de la candidatura soberanista a les elecciones catalanes del 27S, l'exeurodiputáu d'ICV Raül Romeva, señaló que l'acuerdu ente CDC, ERC y entidaes soberanistes pa facer esa llista "nun diz esplícitamente que'l presidente va ser Mas" sinón que nestos momentos toles partes tán negociando cómo va ser el Gobiernu de concentración encargáu de facer la transición a la independencia.

   Nuna entrevista en 'El Periódicu de Catalunya' recoyida por Europa Press, Romeva dixo que la futura presidencia "nestos momentos nun forma parte de la propuesta porque ta bien condicionáu a lo qu'asoceda'l 27 de setiembre". "Según lo que pase esi día vamos ver cómo s'entama tola estructura del Govern y del Parlament. Nun sé como va dir, too ta condicionáu al día 27", añadió.

   Dempués, en declaraciones a la Cadena Ser, precisó que'l pactu ye qu'haya un acuerdu de concentración y que esto ye lo qu'agora ta negociándose, anque almitió que Mas ye "una pieza clave".

   Ye más, preguntáu si'l presidente podría ser él, respondió que nun diz "nin que non nin que sí" y optó por destacar que la so función na llista ye "sumar", igual que la de Carme Forcadell (expresidenta de l'ANC) y Muriel Casals (presidenta d'Omnium Cultural).

   Y xustificó estes particularidaes nel fechu de que, al so xuiciu, nun son unes elecciones normales, sinón "plebiscitaries", pa comprobar l'apoyu que tien la independencia.

   Eso sí, dexó claro que nel decretu de convocatoria electoral nun va poner la espresión "plebiscitaries", sinón qu'esi calter va dalu la xente. "Ye la única fórmula llegal que se mos permitió pa poder facer lo que nun pudimos facer el 9P", argumentó, añadiendo que'l 27S "habrálu que vote en clave autonómica y habrálu que vote en clave plebiscitaria de forma escepcional, única".

   Tocantes a la mayoría que considera necesaria pa entamar el procesu unillateral d'independencia, retrucó que lo "llegal" ye qu'una mayoría d'escaños ye abondo pa dar mandatu a un Gobiernu pero que "tol mundu ye bien consciente de cuanto mayor seya la mayoría en votos meyor". Nesi sen, refugó que pretendan imponese les normes --de mayoríes más cualificaes-- mesmes d'un referendu: "Esto nun ye un referendu, lo que nun vale ye aplicar les regles d'un referendu cuando namás se pudieron facer elecciones".

UNA MAYORÍA PARLAMENTARIA BASTARÍA

   Sobre l'escenariu que s'abriría tres les elecciones catalanes, consideró que "si nun hai una mayoría parlamentaria pa entamar el procesu, nun tien sen siguir". Tamién dixo que vía con bonos güeyos la llista que plantegaba la CUP: "Si una llista sin figures con cargu o responsabilidá fuera posible y pactárase, paeceríame perbién".

   Y, preguntáu pola posibilidá de que'l Gobiernu respuenda impugnando'l procesu ante los tribunales, respondió que "si ésa ye la idea que (Rajoy) tien de la democracia sería una razón de más" pa replantegase'l 'statu quo'.

   Ello ye qu'acusó al presidente del Gobiernu, Mariano Rajoy, de tar "día sí, día tamién, amenazando a Cataluña" y avisó de que "lo que nun se puede peermitir ye "esa situación constante de conflictu, d'acosu" per parte del Gobiernu central, inclusive de voluntá d'humildación, qu'hai per parte de munchos actores y, fundamentalmente, "d'actores d'ámbitu estatal a nivel institucional".

   Según Romeva, "hai voluntá d'humildación cuando s'amenaza con cortar la financiación o con "zarrar l'agua del Ebro", cuando se recurren ante'l Constitucional lleis como la de probeza enerxético --"dícente que nun pues dar respuesta a les persones que más lo precisen", dixo-- o cuando s'aprueben normes "involucionistes" que van contra la "convivencia normal" del castellán y el catalán.