La Sala Civil y Penal del Tribunal Superior de Xusticia de Madrid (TSJM) acordó'l sobreseimientu provisional de la causa que foi abierta contra l'exxuez Elpidio Silva por supuestos delitos d'infidelidá na custodia de documentos y revelación de secretos pola filtración de los correos electrónicos del expresidente de Caja Madrid Miguel Blesa.

   La Sala estimó'l recursu d'apelación presentáu pola defensa del imputáu contra l'autu de la instructora Susana Polo, qu'acordaba tresformar les actuaciones en procedimientu acortáu, trámite equivalente al procesamientu, contra'l xuez qu'envió a Blesa en dos causes a la cárcel.

   Nun autu, dictáu'l pasáu 9 de xunetu, los maxistraos José de la Mata, Eduardo Gutiérrez ya Ignacio José Fernández Soto reconocen qu'había "daqué más que sospeches o conxetures" sobre l'autoría de Silva pa investigalu y que ye "incuestionable que nesti momentu ye la única persona sobre la que s'ofrecieron nicios de tar detrás del espardimientu público del conteníu de correos con conversaciones privaes que taben suxetos a secretu sumarial".

   Sicasí, afirmen que namás hubo dos testigos que-y atribuyeron la filtración y que los sos testimonios nun tienen "calidá" abondo, nin el grau de racionalidá precisu como pa soportar l'acusación sin haber más elementos que cuestionen la so presunción d'inocencia.

   Trátase de dos muyeres que caltuvieron relaciones sentimentales con Elpidio Silva y que se conocieron en 'Twitter', tres sospechar que l'imputáu-yos yeera infiel. Los xueces afirmen que dambes dieron una versión "asemeyada" sobre cómo'l daquella instructor del 'casu Blesa' presumía de caltener los emails nun pendrive y "tener el casu nuna habitación de color verde". "Sicasí, nun comprobaron la realidá de tales afirmaciones, que'l xuez tuviera los datos en dichu soporte y que tuviera guardada copia de la causa na casa", añade l'autu.