El Fondu Monetariu Internacional (FMI) confirmó que Grecia nun satisfizo'l reembolsu de los 360 millones de derechos especiales de xiru (456 millones d'euros) correspondientes al vencimientu que tenía la so fecha de repagu fixada pa esti llunes, anque'l país helenu sí cumplió la so obligación de devolver un vencimientu de 'bonos samurai', deuda denominada en yenes emitida por entidaes non xaponeses.
"La devolución del principal de 360 millones de derechos especiales de xiru (unos 456 millones d'euros) que Grecia tenía de facer güei al FMI nun se recibió", informó'l director de comunicación del FMI, Gerry Rice. D'esta manera, Grecia atropa hasta la fecha atrasos nos reembolsos al FMI por importe d'unos 2.000 millones d'euros, dempués de que'l pasáu 30 de xunu nun ficiera frente al pagu de 1.600 millones d'euros correspondientes a los vencimientos de xunu.
Coles mesmes, el voceru del FMI indicó que la solicitú d'Atenes d'una prórroga nes obligaciones de pagu de Grecia del pasáu 30 de xunu "va debatila'l Conseyu Executivu nes próximes selmanes".
Per otru llau, Grecia sí llogró facer frente a la devolución del vencimientu de 11.700 millones de yenes (unos 86 millones d'euros) en bonos a 20 años denominaos en yenes. El so impagu representara'l primeru de deuda comercial del país helenu y desencadenara'l 'default' de Grecia, según confirmó Mizuho Bank y recueye 'Financial Times'.
Los inversores observaren esti vencimientu con atención pa cubicar el compromisu d'Atenes colos sos acreedores privaos dempués del doble impagu al FMI, que recibe tratamientu d'acreedor oficial.
Axencies de calificación como Fitch y Standard & Poor's precisaron en delles ocasiones que l'impagu de la deuda de Grecia col FMI o'l BCE nun constitúi un eventu de 'default', mientres que dende l'axencia de corretaxe londinense Execution Noble alvierten qu'un impagu de deuda comercial "sería una calamidá".
Grecia tovía tien qu'encarar otros dos pagos de 'bonos samurai', con vencimientos previstos pa febreru y agostu del próximu añu. El Gobiernu griegu emitió deuda denominada en yenes nos años 90 p'aprovechar l'entornu de baxos tipos en Xapón.
