L'ala dura de la Coalición d'Izquierda Radical (Syriza) tachó de "humildante" l'acuerdu algamáu esti llunes ente'l primer ministru griegu, Alexis Tsipras, y los sos socios europeos, antemanando asina una llucha abierta nel senu de l'alianza que gobierna Grecia dende'l pasáu mes de xineru.

   "Dempués de 17 hores de negociaciones, los líderes de la eurozona acabaron con un acuerdu que ye humildante pa Grecia y la so xente", llamentó la denominada Plataforma d'Izquierda. "Ye un nuevu acuerdu más duru que restablez la 'troika' y caltién el país baxo un estatus de colonia de deuda", criticó.

   Esta facción pidió a la población que nun se sienta "decepcionada", sinón que caltenga les sos posiciones "como fizo nel referendu y nes protestes pa siguir col 'non' hasta'l final", n'alusión a la consulta celebrada'l 5 de xunetu pa preguntar a la ciudadanía sobre l'anterior propuesta d'ayuda.

   Nesti sen, la Plataforma pidió un nuevu "non" pa enfrentase al rescate, al neolliberalismu y a l'austeridá "que s'institucionalizaron na zona euru".

   Pa esti llunes de tarde, ta convocada una nueva protesta n'Atenes contra los términos del actual acuerdu, más duru del que refugaron los ciudadanos nel referendu.