Los Estaos miembros aprobaron esti llunes una multa a España de 18,93 millones d'euros pola manipulación por "neglixencia grave" de les estadístiques de déficit y deuda na Comunidá  Valenciana per mediu del tapecimientu sistemáticu d'una parte del gastu sanitario.

   El falsiamientu de les cuentes prodúxose ente 1988 y 2011, pero la multa refierse namás al periodu 2011-2012, dao que la Comisión Europea -responsable de presentar la propuesta de sanción-- namás dispón de poderes pa investigar les estadístiques de los Estaos miembros dende entós. Nel 2012 corrixéronse los problemes detectaos.

   L'importe de la multa ye prácticamente simbólicu, dao que s'asitia bien perbaxo del máximu previstu na llexislación de la UE, que subiría a 2.000 millones d'euros nel casu d'España (el 0,2% del PIB).

   Sicasí, trátase de la primer vez que la UE sanciona a un Estáu miembru por manipulación de les estadístiques basándose na nueva llexislación que s'aprobó nel 2011 de magar el falsiamientu de les estadístiques en Grecia.

   "La nuesa investigación consideró que la comunidá autónoma de Valencia cometió una neglixencia grave al nun rexistrar gastos sanitarios", dixo'l pasáu mayu la comisaria responsable d'Eurostat, Marianne Thyssen, al anunciar que Bruxeles pidiría una multa pa España.

   "Valencia informó incorrectamente sobre'l gastu sanitario y envió datos incorrectos sobre'l gastu públicu a les autoridaes estadístiques españoles. Como resultáu d'esto, mientres munchu tiempu, los datos enviaos por España a Eurostat  nel contestu del procedimientu por déficit escesivu nun yeren dafechu correctos", añadió.

   L'Executivu comunitariu fai responsable de la neglixencia a la Intervención Xeneral de la Generalitat Valenciana, y considera qu'actuó en solitario. Amás túvose en cuenta que les autoridaes españoles cooperaron dafechu cola investigación.