La propuesta de reformes qu'envió'l Gobiernu d'Alexis Tsipras a la Unión Europea, al Bancu Central Européu (BCE) y al Fondu Monetariu Internacional (FMI) inclúin cambios no que cinca al IVA, al respective de dellos impuestos y tamién nel espinosu apartáu de les pensiones.

   El documentu, al que tuvo accesu Reuters, contempla un IVA del 23 por cientu pa restoranes y catering, asina como un IVA pa los hoteles del 13 por cientu. Amás, propón esaniciar la exención d'IVA pa les isles antes d'últimos del 2016.

   Per otra parte, el Gobiernu helenu propón subir l'impuestu de sociedaes nel 2015 y aumentar tamién l'impuestu a les compañíes navieres. Coles mesmes, propónse elevar l'impuestu a los artículos de luxu y aplicar darréu un impuestu sobre los anuncios en televisión.

   N'otru orde de coses, y n'unu de los apartaos más delicaos pal Gobiernu de Tsipras, la propuesta inclúi la eliminación gradual del beneficiu EKAS (Beneficiu de Solidaridá Social de los Pensionistes) pa los pensionistes p'avientu del 2019. Amás, va presentar nel últimu trimestre d'esti añu una llei sobre un nuevu sistema de negociación colectiva. La cláusula de déficit cero sobre les pensiones va suspendese hasta ochobre, cuando se presentará una nueva reforma de les pensiones.

   Amás, el Gobiernu va facilitar que se complete'l procesu de privatización de los aeropuertos rexonales, según los puertos del Pireo, Tesalónica y Hellinikon. La fecha pa la licitación de cara les privatizaciones de los puertos afitaráse antes d'ochobre d'esti añu. Per otra parte, l'Estáu va tresferir les acciones que caltién na empresa de telecomunicaciones OTE a l'axencia de privatizaciones.

   No que se refier al gastu en materia de defensa, el Gobiernu de Tsipras comprometióse a retayalo en 300 millones pa últimos del 2016.