El ministru del Interior, Jorge Fernández Díaz, anunció esti miércoles nel Congresu que los titulares de la vivienda de Ossès (sur de Francia) onde detuvieron ayeri a dos presuntos miembros d'ETA tamién tán arrestaos, colo que s'eleva a cuatro'l total de deteníos hasta agora nesta operación. Fernández Díaz aseguró que "de lo pocoñín" que queda d'ETA "ésta sería la operación más importante" al desarticular en menos d'un añu l'aparatu loxísticu creáu tres la detención d'Izaskun Lesaka y agora, añadió, "namás-y queden los presos".

   En declaraciones nos pasiellos del Congresu, el ministru d'Interior esplicó qu'hasta que nun se practiquen toles prebes de verificación nun podrá confirmase la identidá de los dos homes deteníos el llunes.

   "Hai que ser bien prudentes", comentó en relación a les identidaes de los deteníos. Fontes de la investigación aseguraben ayeri que se trataría de Joseba Íñaki Reta de Frutos, de nomatu 'Zukaitz', y Javier Goienetxea, de nomatu 'Goyele', dambos consideraos como xefes del aparatu loxísticu de la banda y encargaos de les armes y los 'zulos' de la banda.

   La investigación que permitió l'arrestu d'estos dos presuntos miembros d'ETA prollongóse mientres más de dos años, hasta la so llocalización y arrestu nel interior de la casa casa. La operación llevóse a cabu de manera conxunta por axentes de la Guardia Civil y de la Policía francesa, según informó'l Ministeriu d'Interior.