El primer ministru griegu, Alexis Tsipras, prometió esti miércoles que va presentar "reformes creíbles" nos próximos díes pa convencer a la Unión Europea de que conceda un tercer rescate a Grecia, pero pidió a los sos socios europeos un "acuerdu equilibráu" que permita evitar "una rotura histórica".

   "Tenemos un mandatu claru y atayante del pueblu griegu, nun tamos pa entrar en choque con Europa, sinón pa cambiar les mentalidaes y propuestes que tiraron embaxo la nuesa economía", dixo Tspras na so intervención ante'l plenu del Parlamentu Européu n'Estrasburgu (Francia).

   El mandatariu griegu resultó convidáu nel últimu momentu a intervenir nel debate programáu sobre la crisis griega a instancies de los lliberales europeos (ALDE). Dellos eurodiputaos, ente ellos el líder de Podemos, Pablo Iglesias, recibieron de pies y con aplausos a la entrada del hemiciclu a Tsipras, que recibió lo mesmo berros d'ánimu como xiblaes a la so llegada.

   El líder griegu confirmó que va concretase "nos próximos díes" el paquete de midíes que-y esixen los sos acreedores pa estudiar la posibilidá d'un nuevu programa d'ayuda.

   Los xefes d'Estáu y de Gobiernu de la eurozona diéron-y de plazu hasta esti domingu pa llegar un acuerdu y evitar "el peor escenariu", en palabres del presidente del Conseyu européu, Donald Tusk, qu'implica la salida de Grecia del euru.

   Tsipras aseguró que les midíes que va asumir el so Gobiernu van incluyir reformes pa la "redistribución del pesu y de les cargues" y pa dar un "puxu al crecimientu", lo que, asegura, va valir pa dar cobertoria a les necesidaes financieres del país.