La Policía Nacional detuvo esti martes en Petón (Lanzarote) a una muyer acusada de reclutar a muyeres, y tamién a neñes y adolescentes, a les que facilitaba'l so desplazamientu a zones controlaes pola organización terrorista Estáu Islámicu (EI, tamién conocida como Daesh).

   Según informó'l Ministeriu del Interior, la detenida, de nacionalidá española y convertida al Islam, caltenía contactu directu con un importante facilitador del EI en Siria, del que recibía directrices ya instrucciones pa reclutar y facilitar el viaxe a muyeres. "Ye una detención bien importante dende'l puntu de vista de la llucha antiterrorista", dixo'l ministru del Interior, Jorge Fernández Díaz.

   Esta operación, que sigue abierta, coordináronla'l titular del Xulgáu Central d'Instrucción númberu 1 y la Fiscalía de l'Audiencia Nacional, y realizáronla axentes de la Comisaría Xeneral d'Información del Cuerpu Nacional de Policía.

   La detenida, según siempre la versión d'Interior, ta implicada directamente na radicalización y facilitación del viaxe hacia Siria d'otres muyeres, a les qu'afalaba a viaxar, facilitába-yos la ruta y les midíes de seguridá necesaries pa nun ser detectaes mientres el tránsitu hacia Siria. La Policía ta investigando a cuántes muyeres recluyó y envió.

   Motivaes principalmente por una creencia relixosa absoluta y sin fisuras, les neñes y adolescentes taben destinaes a la esplotación sexual, a exercer llabores d'apoyu domésticu y hospitalariu o a realizar funciones de policía de la Sharia (llei islámica) ente muyeres. Un grupu bien reducíu integraría les files de combatientes del Daesh.

   Según Interior, na operación, qu'incluyó un rexistru de la casa de la detenida, súpose que l'arrestada quería desplazase a la zona controlada pol Daesh na rexón sirio-iraquina, p'alquirir un mayor compromisu cola causa.

   Fernández Díaz, que descartó hasta agora ofrecer más datos sobre la operación, destacó que cada vez se repara con más frecuencia'l fenómenu de la captación de muyeres, incluyíes menores d'edá, pa que s'integren nel DAESH o'l Frente Al Nusra en Siria y n'Iraq.

Foto: Archivo.