El xuez de l'Audiencia Nacional Santiago Pedraz archivó la causa abierta contra'l conceyal d'Agora Madrid Guillermo Zapata porque los comentarios que publicó en Twitter contra Irene Villa y les víctimes del terrorismu son "de tou puntu imposible incardinalos" como delitu y porque l'humor negro nun ta penalizáu por cuanto supondría una "clara" inconstitucionalidá del derechu a la llibertá d'espresión.

   Nun autu, fechu públicu esti xueves, el maxistráu decreta'l sobreseimientu de la causa, que s'abrió tres la querella interpuesta por Dignidá y Justicia (DyJ), al entender que los tuits del conceyal madrilanu "nun integren nin una conducta especialmente perversa, nun se da'l dolu específicu" qu'esixe'l delitu d'humildación a les víctimes y la mesma Irene Villa negó sentise dolida por esos mensaxes.

   Nun escritu enviáu al xulgáu'l pasáu 30 de xunu, Irene Villa esplica que los chistes publicaos nesti espaciu dixital "nun afectaron a la so persona, nin-y causaron nenguna humildación". "Conviviendo dende l'atentáu terrorista con esti tipu d'humor negro qu'entendí dende la mio infancia como una espresión de la gran gravedá de los fechos nos que sin querelo vime implicada, y non como una falta de respetu o humildación hacia la mio persona", afirmaba.

   Villa comunicaba amás a Pedraz la so imposibilidá de comparecer en calidá de testigu'l próximu 7 de xunetu na sede xudicial por alcontrase fuera de Madrid nesa fecha y solicitaba que se la resalvaren d'emprestar declaración por tar de baxa maternal y "porque-y afectaría a la so situación anímica y al estáu de lactancia".