Estaos Uníos y Cuba van reabrir les sos embaxaes, restableciendo asina de forma oficial les relaciones diplomátiques conxelaes dende fai más de 50 años, el próximu 20 de xunetu, según informó'l Ministeriu d'Esteriores cubanu nun comunicáu.

   El ministru interín d'Esteriores cubanu, Marcelino Medina, recibió esti miércoles pela mañana nel Ministeriu al xefe de la Estaya d'Intereses d'Estaos Uníos en L'Habana, Jeffrey DeLaurentis.

   El más altu representante estaounidense na isla fizo entrega a Medina, según el comunicáu, d'una carta del presidente estaounidense, Barack Obama, dirixida al so homólogu cubanu, Raúl Castro, "na que confirma la decisión de restablecer les relaciones diplomátiques ente los dos países y abrir misiones diplomátiques permanentes nes respectives capitales, de magar el 20 de xunetu del 2015".

   Coles mesmes, el director de Comunicación del Ministeriu d'Esteriores cubanu, Alejandro Rodríguez Galiano, informó al traviés de Twitter de que'l Departamentu d'Estáu norteamericanu tamién recibió esti miércoles la carta enviada por Castro a Obama nel mesmu sen.