En rempuesta a la entruga realizada pol nuesu eurodiputáu de Los  Pueblos Deciden, respeutu al vertíu d'augües residuales direutamente a la fastera intermareal del ancón de Bañugues, la Comisión  Europea anuncia la prósima “rialización d'obres pa evacuar les augües escontra la depuradora de Maqua, n'Avilés, en llugar d’evacuales a la mar, cerca de la sablera de Bañugues”.

La Comisión Europea, que recuerda tener  “cofinanciao proyeutos rellativos a midíes de tratamientu d'augües nel marcu del Programa del Fondu Européu de Desendolcu Rexonal d'Asturies pal períodu 2007-2013” algamó esta rempuesta per parte de les autoridaes españoles.

Dende Andecha Astur consideramos bien positiva esta rempuesta, y llamentamos namás que fuere precisu recurrir a la Xuión Europea pa que'l Gobiernu español respuenda a una demanda tan cenciella, y cumpla coles sos obligaciones.

Nel mesmu sen queremos denunciar la situación d'indefensión na que se caltien a la ciudadanía cuandu, como nesti casu, non solo se producen esta triba situaciones inaceutables, sinón que'l conxuntu de les istituciones responsables, Conceyu de Gozón, “Principado” y Gobiernu español, ñeguense a facilitar la debía información, y ye preciso recurrir a istancies cimeres.

Per otra parte, Andecha Astur quier amosar la so satisfaición pola axudicación de la obra del muriu pal yacimientu de Bañugues, reivincidación vecinal que llevaba años siendo desoyía sistemáticamente y en cuyu llogru queremos creyer qu'influyó de forma sinificativo les actuaciones d’Andecha Astur coles sos iniciatives a nivel del Congresu de los Diputaos y la Xunión Europea.