El Presupuestu del Parque Nacional de Picos d'Europa pal 2015 va incluyir la primer vez una partida de 181.105 euros p'avanzar nos trabayos de recuperación del Llagu d'Andara, ubicáu nel macizu occidental d'esti espaciu natural.

   Asina lo anunció esti domingu la conseyera en funciones de Ganadería, Pesca y Desarrollu Rural, Blanca Martínez, con ocasión de la so visita a los Puertos d'Áliva pa comprobar sobre'l terrén la oportunidá de los proyectos de reubicación d'infraestructures ganaderes y d'arreglu de les balses de decantación de les escombreres mineres que van haber de recibir lluz verde per parte del Patronatu.

   Martínez, que tuvo acompañada na so visita pola directora xeneral de Desarrollu Rural, Henar Hernando, destacó cómo la rehabilitación del llagu "va potenciar tovía más l'atractivu de Picos pa los visitantes" y va contribuyir a materializar "una de les obsesiones d'esti Gobiernu, como foi aliase cola biodiversidá p'avanzar nel desarrollu d'árees rurales y xenerar nueves oportunidaes de xenerar rentes a la población".

   Ye esa "apuesta" la que fai que seya Cantabria la comunidá autónoma xestora de Picos d'Europa que más fondos aporta esti añu na suma de los Capítulos II, IV y VI: 968.689 euros, frente a los 815.000 de Castiella Lleón y los 903.814 d'Asturies. "Eso va permitimos executar otres actuaciones importantes, como'l caltenimientu d'infraestructures o la impermeabilización del Centru de Visitantes de Sotama", esclaró.

   "Picos nun tien de frenar la so progresión", insistió Martínez, que citó la necesidá d'acometer nel cortu plazu la construcción d'un aparcamientu de regulación n'Espinama o l'adaptación del centru de Sotama a les persones con discapacidá. Too ello sin olvidar la remodelación del Escobiu de la Hermida, la conclusión del Plan Rector d'Usu y Xestión, y la necesidá d'establecer mecanismos, económicos y normativos, que permiten consolidar les actividaes tradicionales.