La vicesecretaria d'Estudios y Programes del PP, Andrea Levy, criticó la puesta n'escena de la proclamación de Pedro Sánchez como candidatu del PSOE a les elecciones xenerales porque mientres fai'l so discursu frente a una bandera española da-y l'alcaldía de Badalona a una señora de la CUP, 'la Bildu de Cataluña', que "quitó la bandera d'España y punxo la Estelada".

   Nuna entrevista en 'Los desayunos de TVE', recoyida per Europa Press, Andrea Levy llamentó que'l presidente de Ciudadanos, Albert Rivera, nun se presente en Cataluña. Amás, dio "la bienvenida al pluralismu" pa les xenerales, pero recuerda a les nueves formaciones que "nun solo se fai política falando", si non que se fai política "remangándose y poniéndose a gobernar".

   Levy ve con "murnia" la situación de CiU en Cataluña y  llamenta qu'a "aquelles persones que taben pola moderación" separárenles del Executivu catalán, dao que según ella'l presidente de la Generalitat, Artur Mas, "ta radicalizándose" y prefier "a la CUP qu'abrazase a los moderaos".

   Nesti sen, calificó a Mas de "Atila, porque per onde pasa, estrózalo too" y píde-y que "vaya".

   Per otru llau, la vicesecretaria emponderó'l llabor del PP catalán, del que provién, porque "foi la trinchera del Estáu en Cataluña". "El que yera incómodo pa los independentistes foi'l PP catalán", remachó.

   Sicasí, Levy tamién fizo autocrítica y dixo que'l Partíu Popular tien qu'estudiar "les causes" poles que perdió "la confianza de los votantes que quedaron en casa o fueron a otres formaciones". Aseguró que nun s'engurria ante les crítiques y que "ye bueno" recibiles.