El secretariu xeneral de Podemos, Pablo Iglesias, considera "un problema políticu tráxicu" que "tovía" haya "ente 400 y 500 prisioneros (d'ETA) reteníos en cárceles a cientos de kilómetros de les sos families", según afirma nuna entrevista na revista 'New Left Review' recoyida por Europa Press.

   Nella, Iglesias caltién que nos últimos años "el conflictu nel País Vascu perdió daqué de la so centralidá, que yera esencial pal réxime", pol altu'l fueu y el posterior "abandonu de la llucha" per parte d'ETA. "Anque tovía hai ente 400 y 500 prisioneros reteníos en cárceles a cientos de kilómetros de les sos families. Tovía ye un problema políticu tráxicu", prosigue'l testu.

   Pal líder de Podemos, --que nun momentu refirióse a la intención de votu del partíu "nel País Vascu, incluyíu Navarra"-- "la cuestión nacional" ye probablemente l'asuntu más importante que dexó abiertu "el réxime del 78", asina que tuvo "sangrando abiertamente" dende la Transición, lo mesmo nel País Vascu como en Cataluña y "en menor midida en Galicia".

   Según el so analís, a midida que la cuestión vasca foi "perdiendo centralidá", la catalana foi faciéndose más "prominente", de manera que "hasta la emerxencia de Podemos nel 2014, Cataluña yera l'aspectu más visible y meyor articuláu de la crisis del réxime".

   Ello ye que cree que "el desafíu catalán al réxime de 1978" perdió parte de centralidá cola emerxencia de Podemos, porque la formación morada pon "la cuestión social" per delantre de la "nacional" y eso ganó-yos crítiques. Sicasí, Iglesias cree que Podemos podría ser primer fuerza en Cataluña nes xenerales y, d'esa manera, tar "en meyor posición" pa encarar los dos retos nun procesu constituyente.

   Eso sí, almite que la cuestión del soberanismu ye difícil pa podemos, porque "coexisten munches sensibilidaes" y almite tamién qu'abrir un procesu constituyente "requeriría un nivel d'apoyu que ye malo d'imaxinar agora mesmo".

EL TC FUNDIÓ AL PSOE EN CATALUÑA

   Amás, reconoz que Cataluña ye bien importante pa les aspiraciones de Podemos. Según diz, l'expresidente socialista José Luis Rodríguez Zapatero debía de ser consciente de que precisaba ganar Andalucía y Cataluña pa ganar les xenerales, pero'l Tribunal Constitucional, cola sentencia del 2010 que retayó'l 'Estatut', "ayudó a fundir" al PSOE (el PSC) nesa comunidá y, d'esa manera, solmenó "un golpe mortal a les posibilidaes del PSOE de volver ganar unes elecciones xenerales".

   La entrevista tuvo llugar el pasáu 15 d'abril, más d'un mes antes de les elecciones municipales y autonómiques, y nella avanzaba que tolos acuerdos postelectorales teníen qu'evaluase en función del oxetivu principal de Podemos, ganar les elecciones xenerales de payares.

   Ési foi'l día en que'l rei Felipe VI visitó'l Parlamentu Européu en Bruxeles y Pablo Iglesias regaló-y la serie 'Juego de Tronos' diciendo que-y sería útil pa entender la realidá política española. Na entrevista, esplica que regala-y la serie, na que'l rei ye una figura fráxil y siempre cuestionada, foi "un mensaxe bien agresivu" porque venía dicir "nel xuegu de la política, nel futuru pues dexar de ser xefe d'Estáu, porque asina ye como funciona la política".

   Ye más, defende que la mera posibilidá de dicir al Rei, anque "seya d'una forma irónica", que toles opciones son posibles, foi "en sí mesmu un xestu subversivu". Iglesias argumenta que la so decisión de dir a aquella cita col rei, pero sin corbata, foi la so forma de "baillar" o "xugar" con un escenariu que-y resultaba "incómodu y contradictoriu", porque declarase republicanu y nun dir a la cita (como ficieron los eurodiputaos d'IU) enoxa a sectores de la sociedá "que son fundamentales pal cambiu políticu".

   Asina, él mesmu esplica qu'evita pronunciase nel exa monárquico-republicanu", porque recuerda a la herencia de la Guerra Civil española y ésta "desgraciadamente" ta perdiendo la batalla de cómo esplicar la realidá, y sicasí prefier plantegar l'asuntu en términos de democracia, de que los ciudadanos tengan que poder escoyer al so xefe d'Estáu. Tamién asume'l "problema" de que la Transición tovía tien "un enorme apoyu social".