El Papa Francisco clama na so última encíclica 'Laudato Si' sobre'l "maltratu" que les sociedaes dieron al Planeta mientres los últimos dos sieglos, denuncia la "debilidá" de la reacción política internacional y propón unos nuevos vezos de consumu pa que La Tierra nun torne en "un inmensu depósitu de porquería".

   "Nunca maltratamos y mancamos la nuesa casa común como nos últimos dos sieglos", sorraya Francisco, na que ye la so segunda encíclica, publicada esti xueves pol Vaticanu y escrita n'español, col títulu referente al Cánticu de les Criatures, compuestu por San Francisco de Asís, como allabancia a la naturaleza.

   El documentu papal ye la segunda encíclica del Pontífiz arxentín dempués de 'Lumen Fidei', escrita a cuatro manes xunto col Papa eméritu Benedicto XVI. Mientres seis capítulos y casi 200 páxines, el Papa afala a crear un sistema normativu qu'incluya "llendes infranquiables" y asegure la protección de los ecosistemes ante "nueves formes de poder derivaes del paradigma tecno-económicu".

   "¿Pue esperase que la llexislación y les normes rellacionaes col mediu ambiente seyan realmente eficaces?", pregúntase, de la que pon l'exemplu de países con una llexislación clara pa la protección de montes que siguen siendo "testigos mudos de la frecuente violación d'estes lleis".

   Per otru llau, anima a cambiar "los vezos dañibles de consumu" que pal Pontífiz, dacuando paecen "suicides", como'l "creciente aumentu del usu y la intensidá" del aire acondicionáu. "Si daquién observara dende fuera la sociedá planetaria, ablucaríase ante comportamientu talu que dacuando paez suicida", esclama.

   Pal Papa, "el ritmu de consumu, d'esperdiciu y de tracamundiu del mediu ambiente superó les posibilidaes del planeta, de manera tala que l'estilu de vida actual, por ser insostenible, namás puede acabar en catástrofes".