El xuez que lleva'l denomináu 'casu Osasuna' notificó esti miércoles el llevantamientu parcial del secretu de les dilixencies abiertes el pasáu 19 de febreru p'averiguar el destín de polo menos 2,4 millones d'euros estrayíos de les cuentes del club.

   De lo investigao, el maxistráu aprecia nicios de qu'importantes cantidaes de dineru destináronse a amaños de partíos de la temporada 2013-14, en concreto 250.000 euros a xugadores del Espanyol por empatar con Osasuna y 650.000 euros a xugadores del Betis por dos partíos, 400.000 por ganar al Valladolid y 250.000 por dexase perder con Osasuna.

   Al respective, el maxistráu sigue investigando otros partíos col resultáu presuntamente alteráu por Osasuna, asina como'l destín del restu del dineru estrayíu en metálico de les cuentes del club, según informó'l Tribunal Superior de Xusticia de Navarra.

   Nes dilixencies abiertes, el titular del Xulgáu d'Instrucción númberu 2 de Pamplona nun topó evidencies de que se firmara un contratu ente Flefield y Osasuna por importe de 1.440.000 euros.

   El xulgáu ta pendiente de recibir la información reclamada a les autoridaes portugueses, al traviés de la correspondiente comisión rogatoria, magar tolos datos apunten a que tanto'l contratu presuntamente celebráu cola referida sociedá como les factures derivaes de dichu contratu son falsos y creáronse por directivu del club, col envís de xustificar contablemente la salida d'importantes cantidaes de dineru en metálicu, informó'l TSXN.

   Otramiente, el xuez considera acreditao que'l supuestu pagu efectuáu'l 1 de xunu del 2013 a los axentes inmobiliarios Cristina Valencia y Alberto Nolla por importe de 900.000 euros nun llegó a realizase nunca y que'l recibu que recoyía dichu presuntu pagu ye, igual qu'asocede col contratu y factures de Flefield, falsu y creóse creáu col mesmu fin qu'estos documentos.

21 IMPUTAOS

   Na causa principal tán imputaes 21 persones, ente ellos los dos últimos expresidentes de Osasuna, l'expresidente de la Xunta Xestora, l'antiguu xerente, exdirectivos, exempleaos y exfutbolistes del club 'rojillo', asina como futbolistes n'activo pertenecientes a otros equipos.

   El maxistráu caltién el secretu d'una parte de les actuaciones  con cuenta d'evitar que la conocencia peles partes de diches dilixencies puea perxudicar el bon fin del procesu, esto ye, el descubrimientu de lo verdaderamente asocedíu n'Osasuna nos últimos años.

SOSPECHES SOBRE IZCO Y LA SO XUNTA DIRECTIVA

   El xuez acordó tamién abrir una pieza separada B, pa estender la investigación a la presidencia de Pachi Izco, al descubrir nes investigaciones realizaes hasta la fecha qu'ente'l 2003 y el 2007 estrayéronse en metálico, per mediu de la retirada de billetes, un total de 3.090.000 euros de les cuentes del club.

   En concreto, según consta nel autu nel que'l xuez entama la pieza separada B, nos años 2003, 2004 y 2005 sacóse dineru en metálico por importe total de 1.380.000 euros; nel 2006 un total de 1.260.000 euros y nel 2007 un total de 450.000. El xuez caltién que nun ta acreditao bastante'l destín dau a estes cantidaes.

   Nel autu, el maxistráu dexa claro qu'esta resolución nun implica de nenguna manera la imputación de delitu dalgunu a los directivos, xestores o encargaos de la contabilidá d'Osasuna neses feches.

   Sicasí, col fin d'atayar la posible prescripción de los delitos, considera preciso abrir una investigación a les persones que naquella época tuvieron responsabilidaes directives y de xestión o control contable del patrimoniu d'Osasuna, esto ye, los miembros de la so xunta directiva, el xerente, el director xeneral o financieru y el contable.

Foto: DENIS DOYLE