El rei Felipe VI decidió retira-y el títulu de duquesa de Palma a la so hermana la Infanta Cristina seis meses dempués de que'l xuez José Castro decidiera sentala nel banquín pa xulgala como cooperadora necesaria de dos delitos fiscales cometíos presuntamente pol so home, Iñaki Urdangarin, implicáu nun presuntu casu de malversación de fondos públicos rellacionáu colos contratos millonarios que firmó coles Alministraciones balear y valenciana.

   La decisión, que va publicar güei'l Boletín Oficial del Estáu (BOE) en forma de real decretu, consiste específicamente en prohibir a la infanta que faiga usu d'esi títulu, que-y concedió el so padre, el rei Juan Carlos,  por cuenta del so enllaz matrimonial con Urdangarin en 1997. Solo'l rei -nesti momentu Felipe VI-- tenía la capacidá de retira-y esi títulu nobiliariu.

   La casa'l rei anunció esti xueves la decisión, que llega malpenes una selmana  primero que'l reináu de Felipe VI cumpla'l so primer aniversariu. Nel so discursu de proclamación, Felipe VI comprometióse a facer más exemplar a la institución porque asina lo demanden "con razón" los ciudadanos.

   "Güei, más que nunca, los ciudadanos demanden con tola razón que los principios moral y éticu inspíren-y la exemplaridá presida- la nuesa vida pública. Y el rei, a la cabeza del Estáu, tien que ser non yá un referente sinón tamién un servidor d'esa xusta y lexítima esixencia de tolos ciudadanos", dixo naquella mañana del 19 de xunu del 2014 el nuevu monarca ante les Cortes.

   La retirada del títulu a la Infanta Cristina produzse nun momentu en que'l 'casu Nóos', que yá zarró la fase d'instrucción dempués de trés años, traviesa nesti momentu una fase entemedia primero qu'entame'l xuiciu, pendiente de fecha.

   L'últimu movimientu asocedíu nesti procesu foi la decisión de la infanta Cristina de recurrir esta mesma selmana l'autu del xuez José Castro pol que'l maxistráu refugaba rebaxa-y la fianza de 2,7 millones d'euros impúnxo-y n'avientu pasáu, cuando abrió xuiciu oral contra ella. La infanta Cristina solicitaba que se-y rebaxara a 449.500 euros esa fianza, qu'hasta'l momentu nun depositó.

   Felipe VI comunicó esta mesma tarde a la so hermana la decisión de retira-y el títulu, minutos primero que la Casa'l Rei ficiera públicu l'anunciu, informaron a Europa Press fontes solventes. Trátase d'una decisión que pertenez n'esclusiva al monarca, a diferencia d'una hipotética renuncia de la Infanta a los sos derechos dinásticos, movimientu que namás pue venir d'ella, anque se trate d'un xestu que-y pidió hasta'l so padre, el Rereii Juan Carlos, al traviés d'entemediarios, según desvelaba va meses el periodista Fernando Ónega nel so llibru 'Juan Carlos I, el hombre que pudo reinar'. Hasta la fecha, la infanta Cristina nun dio muestres de tar dispuesta a dar esi pasu.