El presidente de la Hermandá de Defensores d'Uviéu, Fermín Alonso Sábada, mostró'l so malestar dempués de que'l Conceyu d'Uviéu decidiera retirar de la plaza d'España'l medallón de Francisco Franco, tres una sentencia xudicial por una denuncia del PSOE. "Quiten el medallón del home que creó la seguridá social y dio casa a los obreros", señala.

   Alonso Sábada, unu de los pocos combatientes que queden de la Guerra Civil, manifestó, en declaraciones a Europa Press, que la retirada de la reconocencia al xeneral Franco ye un error, dao que "gracies a él España ta agora mesmo como ta". Y recordó que "Franco foi'l xeneral más mozu de la historia, con 33 años, polos sos méritos militares y el so amor a España".

   El presidente de la Hermandá de Defensores d'Uviéu diz que magar que "la izquierda quier borrar y cambiar la historia", intenta que los mozos s'enteren que Franco "foi l'artífiz de la seguridá social, de que los obreros tengan güei una vivienda en propiedá, de que la xente tuviera un trabayu fixu y seguru, de les pagues estres de branu y de Navidá, promotor de la clase media n'España... y de munches coses más".

   Sicasí, anque dende ayeri'l medallón de Francisco Franco yá nun ta na Plaza d'España d'Uviéu, Alonso Sábada aseguró que los miembros de la Hermandá que preside van siguir celebrando'l 18 de xunetu (día del alzamientu militar); el 1 d'abril (fin de la guerra) y el 20 de payares (muerte de Francisco Franco) na citada plaza.

   "Nós nunca pidimos que retiren nada del bandu contrariu. Hai nel parque San Pedro de los Arcos n'Uviéu una estatua de la militante comunista Aída de la Fuente y respetámosla porque ella dio la vida polo que defendía. Nesi casu tamién pidimos nosotros respetu", añadió.