El Ministeriu d'Industria, Enerxía y Turismu publicó esti xueves nel BOE la resolución que da entamu al nuevu sistema de facturación de la eletricidá por hores pa los consumidores que dispongan d'un 'contador intelixente', esto ye, dixital y telexestionáu.

   El nuevu sistema va entamar el 1 de xunetu, magar les comercializadores y distribuidores van disponer d'un plazu d'adaptación hasta'l 1 d'ochobre pa enllantar el nuevu mecanismu. Los ficheros d'intercambiu d'información ente les empreses y otros aspectos técnicos tendrán qu'aplicase antes del 1 de xineru del 2016.

   D'equí p'arriba, la factura va calcular en función del consumu que se realice cada hora y del preciu que marque nesi momentu'l mercáu mayorista d'eletricidá, conocíu como 'pool'. El preciu pa cada día va tar disponible un día antes, de magar les 20.15 hores, na web de Rede Eléctrica d'España (REE).

   Amás de un 'contador intelixente', pa disponer d'esta modalidá ye necesariu amás tener la tarifa regulada, conocida dende l'añu pasáu como Preciu Voluntariu al Pequeñu Consumidor (PVPC) y reservada pa potencies inferiores a 10 quilovatios (kW).

   Esti PVPC acabó coles puyes eléctriques, nes que se fixaba'l preciu de la eletricidá pal siguiente trimestre, y reimplantó un modelu de factures bimestrales. Si'l contador ye analóxicu, el recibu emítese al cabu de dos meses con un preciu axustáu a unos perfiles de consumu.

   La oscilación del preciu del quilovatiu hora en función del mercáu eléctricu va afectar namás a cerca del 37% del recibu. Sobre otru 25% correspuende a impuestos, ente ellos l'IVA, mientres que'l 38% restante val pa sufragar los costos regulaos del sistema y págase al traviés del términu de potencia (un dineru fixo por cada quilovatiu contratáu) y de los peaxes (en función del consumu).

   Amás de esta opción, el PVPC tamién ofrez otres alternatives de contratación a los consumidores, ente elles un preciu fixu del quilovatiu hora pa un añu enteru o un acuerdu billateral cola compañía conforme a les condiciones pactaes.

   La nueva factura hora a hora, al formar parte de la tarifa regulada, namás van poder suministrala les llamaes comercializadoras de referencia, que son Endesa, Iberdrola, Gas Natural Fenosa, EDP España y Y.ON España. Cola nueva reforma, otres comercializadoras puen formar parte d'esti grupu si cumplen ciertos requisitos.

   A zarru del añu pasáu, el númberu de contadores dixitales instalaos rondaba los 14 millones, de los que 10 millones taben telexestionaos. A esa fecha, les eléctriques teníen que tener más del 35% del parque instaláu, y toes elles superen estes tases.