El númberu de persones que se dan a la fuga cada hora de les estaciones de serviciu españoles sin pagar sube a una media de cuatro, según s'aprecia na última memoria añal de l'Asociación Española d'Operadores de Productos Petrolíferos (AOP).

   En concreto, l'asociación cifra en 115.000 les fugues d'estaciones de serviciu nos trés últimos años, lo qu'equival a más de 38.000 cada añu, a 105 al día o a una media de 4,3 mientres caúna de les hores del día.

   Na so memoria, l'AOP informa de la creación d'un grupu de trabayu cola Guardia Civil p'atayar esti delitu, que cada añu tien un costu económico de cinco millones d'euros, al qu'hai qu'añadir unos dos millones vincualos a la tramitación de les denuncies.

   L'asuntu ye "de creciente importancia" y los sos afectaos son, na so mayor parte, pequeños empresarios minoristes, señala l'asociación, que vien trabayando dende setiembre colos Cuerpos y Fuerces de Seguridá pa buscar soluciones.

   El grupu ta lideráu pola AOP, na que s'integren Repsol, Cepsa y BP, y cuenta cola participación de l'asociación d'operadores independientes UPI y de les asociaciones d'empresarios d'estaciones de serviciu Aevecar y Ceees.

   Los trabayos previstos tienen como oxetivu "formar ya informar" a l'Alministración competente sobre la trescendencia d'esti problema, que nun solo xenera una amenorga económica, sinón que conlleva riesgos asociaos a la seguridá y la integridá física de los emplegaos que traten d'evitar les fugues.

   Los participantes nel grupu de trabayu ofrecieron a l'Alministración tola collaboración posible nel diseñu y puesta en marcha de soluciones que permiten prevenir "estes incidencies y amenorgar el so impactu".