La Oficina Federal de Xusticia de Suiza detuvo esti miércoles en Zurich a siete persones nel marcu d'una investigación abierta n'Estaos Uníos por presunta corrupción nel senu de la FIFA y rellacionada coles axudicaciones de les Copes del Mundu del 2018 y 2022 a Rusia y Qatar, respectivamente.
Les fuerces de seguridá suices presentáronse esti miércoles nel hotel de cinco estrelles Baur au Lac y procedieron a los arrestos a pidimientu del Departamentu de Xusticia d'Estaos Uníos. Ente los cargos, derivaos d'una investigación llevada a cabu pol FBI dende va trés años, figuren fraude electrónico, blanquéu de dineru y estorsión.
Jeffrey Webb y Eugenio Figueredo, vicepresidentes de la FIFA, Eduardo Li, miembru del Comité Executivu, Eugenio Figueredo, Rafael Esquivel, presidente de la Federación Venezolana, José María Marín, expresidente de la Confederación Brasileña, Julio Rocha y Costas Takkas seríen les persones deteníes na ciudá suiza según el Departamentu de Xusticia Estaounidense.
Esti tamién confirmó que tamién Jack Warner y Nicolás Leoz, presidentes de la Concacaf y la Conmebol, respectivamente, tamién tán investigaos, pa un total de 14 persones, y que se fizo un rexistru nes oficines en Miami de la primera, mientres que la FIFA esclaró públicamente que nin Joseph Blatter nin Jerome Valcke, presidente y secretariu xeneral, nun tán implicaos nes sospeches de sobornu.
La Oficina Federal Suiza aseguró nun comunicáu que s'abrieron "procedimientos criminales" contra estes persones por ser sospechosos de "mala xestión criminal y de blanquéu de capitales en relación cola asignación de los Mundiales de Fútbol del 2018 y el 2022" que van disputase en Rusia y Qatar, respectivamente.
Por ello, recoyó "datos y documentos" almacenaos nos sistemes informáticos de la FIFA y que yá confiscaren "relevantes documentos bancarios en delles instituciones financieres en Suiza", y toa esta información "va valir pa procedimientos criminales lo mesmo en Suiza como nel estranxeru".
"Nos procedimientos criminales en Suiza, abiertos el 10 de marzu, sospechábase d'irregularidaes na axudicación de los Mundiales del 2018 y el 2022", indicó'l comunicáu de la OAG, que considera que "esti sospechosu arriquecimientu inxustu prodúxose en parte en Suiza" y que tamién existen sospeches de "blanquéu de dineru al traviés de cuentes suices".
Por esti motivu, y tres la recoyida de los archivos, va proceder xunto cola Policía Criminal Suiza a preguntar a 10 persones que "tomaron parte nes votaciones" pa decidir les dos próximes Copes del Mundu "como miembros del Comité Executivu (FIFA) nel 2010 y de cara a que-yos faciliten información".
