El PSOE, la Izquierda Plural (IU-ICV-CHA), UPyD, Compromís-Equo, Coalición Canaria y Geroa Bai presentaron esti xueves ante'l Tribunal Constitucional un recursu contra la Llei de Seguridá Ciudadana, conocida como 'Llei Mordaza', coles mires de frenar el retayu de derechos promovíu pol Gobiernu de Mariano Rajoy.

   El voceru socialista nel Congresu, Antonio Hernando, la diputada d'IU Caridá García, el voceru axuntu d'UPyD, Andrés Herzog, y el diputáu de Compromís, Joan Baldoví, acudieron a la sede del Tribunal Constitucional pa presentar el recursu contra "la Llei Mordaza" y les devoluciones "en caliente", que na norma defínense como 'refugos en frontera'.

   Hernando recordó qu'esti recursu representa tamién el refugu de munches ONG y asociaciones a esta llei aprobada nel Congresu col únicu votu a favor del PP. "Tamos equí cumpliendo col compromisu de frenar el retayu de derechos promovíu pol PP, ye una llei prevista pa frenar les protestes, quexes y manifestaciones de los ciudadanos", esplicó.

   El diputáu socialista recordó que queden 72 hores pa les elecciones autonómiques y municipales, pero sorrayó que "la democracia nun solo ye votar", sinón que los derechos y llibertaes de los ciudadanos tamién se defenden con otres actuaciones como les remanes ante'l Tribunal Constitucional.

RETROTRÁI A TIEMPOS SUPERAOS

   La diputada d'IU, Caridad García aportunó en que la Llei de Seguridá Ciudadana "*conculca" artículos de la Constitución, "esa que'l PP diz defender", y "ataca" a los derechos y llibertaes de los ciudadanos. "Quiciabes el mesmu Franco nun la hubiera consideráu meyor", llegó a dicir aportunando en qu'esta lexislación "retrotraye" a España a tiempu que yá se creíen superaos".

   Tamién censuró la regulación de les devoluciones en caliente', que *conculca los derechos de ciudadanos d'otros países a "buscar y ameyorar la so calidá de vida" y que, según recordó, "fueron contestaes dende l'ámbitu européu".

   Sicasí, reconoció que se trata d'una llei "bien mesma" del ministru del Interior, Jorge Fernández Díaz, daquién que "considera muncho más importante dir poner flores a una imaxe que defender los derechos y llibertaes de los ciudadanos".

LA GUINDA A UNA LLEXISLATURA NEGRA

   Esta llei "pon la guinda a una llexislatura negra del PP", denunció Andrés Herzog per parte d'UPyD, que censuró que la infinidá de "recortes sociales" d'esta llexislatura del PP tán agravaos "por retayos en derechos humanos".

   "Frente a eso confiamos en qu'esta llei declárese inconstitucional y acabar con una obsesión pol control del PP en tolos ámbitos. Nun solo ye desproporcionada sinón tamién innecesaria", dixo coincidiendo col diputáu de Compromís, que llamentó que'l Gobiernu nun sacara alantre munches lleis necesaries y sicasí aprobara lleis "inútiles" como ésta.

   Y anque confió na decisión del Tribunal Constitucional, Baldoví avisó de qu'en casu contrariu'l panorama va ser distintu mientres la próxima llexislatura, cuando seya posible sacar alantre "lleis consensuaes que nun prohíban y torguen la democracia de los ciudadanos".