El documental Secrets, Politics, and Torture desatapa como la CIA usó 'La noche más oscura' (Zero Dark Thirty), la cinta dirixida por Kathryn Bigelow que relata la busca y captura d'Osama bin Laden, pa xustificar el so programa de tortures.

   La cadena PBS emitió, dientro de la so serie documental 'Frontine', esta película que pretende mostrar cómo, pa xustificar el so programa de tortures, la CIA fizo prevalecer "la so versión de la historia" en llugar de lo que realmente asocedió al traviés de la película protagonizada por Jessica Chastain, una de les cintes más aclamaes del 2012 que llogró cinco nominaciones a los Oscar.

   Meses antes del estrenu de la película yá hubo una gran discutiniu  sobre l'usu de 'La noche más oscura' con fines propagandísticos y sobre la precisión de la película y la so representación de les tortures como ferramienta fundamental pa llograr la información vital qu'ayudó a dar col paraderu d'Osama bin Laden.

   Munchos políticos estaounidenses, ente ellos el que fuera candidatu republicanu a la Casa Blanca John McCain, punxeron en duda la veracidá de la cinta ya inclusive abrióse una comisión d'investigación nel Senáu pa determinar qué grau d'accesu tuvieren Bigelow y el so guionista Mark Boal a documentos clasificaos de la CIA pa realizar la película. Too quedó en nada.

   Agora'l documental 'Secrets, Politics, and Torture' revela cómo Hollywood tornó nun "blancu fácil" de la CIA y cómo lo utilizó pa ofrecer al mundu la so versión de los fechos. Nel documental inclúyense testimonios bien significativos como'l de la senadora Dianne Feinstein, presidenta del Comité del Senáu sobre Intelixencia, qu'evidencia la discordancia ente lo que se muestra en pantalla y lo que realmente asocedió. "Vimos la película díes antes del estrenu y en 20 minutos marchamos. Nun pudi soportalo, yera demasiao falsa".

   Feinstein referíase, apunta The Daily Beast, a la representación del programa de tortures de la CIA como ferramienta indispensable pa llograr la llocalización y posterior captura del líder d'Al Qaeda, executáu'l 2 de mayu del 2011. Asina, el documental retrata la película de Kathryn Bigelow, que pretende ser el relatu definitivu de la historia, como una visión sesgada, fuertemente influyida pola CIA y la so oficina de prensa.

   L'axencia diera a los cineastes accesu estraordinariu a detalles de la operación a los que la prensa nunca tuvo accesu. "Una gran cantidá de persones que cubría'l día a día de la busca de Bin Laden como yo lo fizo, nun mos averamos a esi tipu de cooperación per parte de l'axencia pa la historia dende dientro", afirma'l veteranu periodista del Washington Post Greg Miller.