El secretariu xeneral de Podemos, Pablo Iglesias, defendió esti llunes que na so formación nun hai "xenerales mediocres", al contrario de lo qu'aseguró'l exsecretariu de Programa Juan Carlos Monedero. Coles mesmes, Iglesias negó qu'al facer esta afirmación, el que fuera dirixente tuviera refiriéndose al númberu dos, del partíu, Íñigo Errejón.

   "En Podemos nun hai xenerales mediocres, hai xente qu'ocupa delles responsabilidaes. En cualquier casu, la crítica de Juan Carlos siempres ye útil", afirmó en declaraciones a Cuatro, recoyíes por Europa Press.

   Nuna entrevista concedida a El País, Monedero apostó por "desarmar" a los "xenerales mediocres" que formen parte de Podemos, y llanzó un avisu sobre'l posible enclín de la formación a la moderación. "La moderación desarmaría a Podemos", alvirtió.

   Preguntáu por estes apreciaciones, Iglesias negó qu'existan dichos "xenerales mediocres", y aseguró que "en nengún casu" Monedero taba pensando n'Errejón. "A Errejón podrán acusalu de munches coses menos de mediocridá. Hai pocos dirixentes políticos tan brillosos como Errejón nesti país", atayó.

   "Juan Carlos, Íñigo y yo llevamos trabayando xuntos munchos años, somos amigos y siguimos debatiendo de política", apuntó, n'afirmando que, al salir de la dirección, Monedero "va poder exercer agora una función crucial", que va consistir en que daquién-yos tire de les oreyes de xemes en cuando" y avíselos: "Perhí non". "Precisamos críticos lleales y Juan Carlos serólo", previó.