El presidente de Ciudadanos (C's), Albert Rivera, aseguró esti vienres que nun pue poner "la mano nel fueu" polos 20.000 candidatos que va presentar la so formación nes elecciones autonómiques y municipales del próximu día 24 y que los líderes del restu de formaciones tampoco van poder facelo. "Nin yo nin Mariano Rajoy nin Pedro Sánchez nin Pablo Iglesias nin naide", apuntó.
Nuna entrevista en Radio Nacional d'España (RNE) recoyida por Europa Press, Rivera destacó que Ciudadanos ye "l'únicu partíu d'España qu'incluyó la incompatibilidá xurídica de tar imputáu por corrupción política y ocupar un cargu públicu o un cargu orgánicu". "Prestábame que tolos partíos se sumaren a eso, a les llistes abiertes y a les primaries", dixo.
Tamién destacó que'l so partíu adoptó "midíes previes" contra la corrupción como "pidir a la xente currículos, facer entrevistes, sentase cola xente y faecr un control ferrial a los cargos públicos".
LLAMADA DE SUSANA DÍAZ
Rivera, que defendió la necesidá de "un cambiu sensatu y fondu", reveló que "nos últimos díes" la presidenta en funciones de la Xunta d'Andalucía, Susana Díaz, llamólu pa preguntar la so "posición" sobre la so investidura y que-y treslladó que tamién taba conversando col presidente del Gobiernu, Mariano Rajoy, y col secretariu xeneral de Podemos, Pablo Iglesias.
"Tresmiti-y lo mesmo que'l nuesu candidatu Juan Marín, que queremos un pactu contra la corrupción que se cumpla y non qu'haya aforaos y privilexaos" como'l diputáu socialista Manuel Chaves, imputáu ante'l Tribunal Supremu nel casu de los ERE. Tamién dixo que'l so partíu "foi l'únicu que nun se llevantó de la mesa" de negociaciones y apuntó que Podemos y el PP "tendríen que baxar a la mesa de la que fuxeron".
De la mesma, insistió en que Ciudadanos va ser "bien esixente" y nun va dar "un cheque en blancu" al PSOE, que "dexó los ERE nos últimos años". "Quiero y prestábame qu'empezara la llexislatura n'Andalucía de mano a trabayar pero nun podemos utilizar una astención del nuesu partíu simplemente pa que too siga igual", indicó.
