El Plenu del Tribunal Constitucional (TC) almitió a trámite'l recursu presentáu pol Gobiernu contra'l Decretu Llexislativu 1/2014, de 23 de xunetu, pol que s'aprueba'l testu refundíu de les disposiciones llegales del Principáu d'Asturies en materia de tributos propios. La decisión acarreta la suspensión de la norma.

   El Tribunal acordó dar treslláu de la demanda al Congresu de los Diputaos y al Senáu, asina como a la Xunta Xeneral y al Conseyu de Gobiernu del Principáu d'Asturies, que van disponer d'un plazu de quince díes pa personase nel procedimientu y formular alegaciones, según informó'l Tribunal Constitucional al traviés d'una nota de prensa.

   El Plenu acuerda tamién la suspensión automática de la norma recurrida al invocar el Gobiernu l'aplicación del artículu 161.2 de la Constitución ("El Gobiernu va poder impugnar ante'l Tribunal Constitucional les disposiciones y resoluciones adoptaes polos órganos de les Comunidaes Autónomes. La impugnación va producir la suspensión de la disposición o resolución recurrida, pero'l Tribunal, nel so casu, tendrá que ratificala o llevantala nun plazu non superior a cinco meses").

   En tou casu, el TC recuerda que l'almisión a trámite nun supón pronunciamientu algún sobre'l fondu del recursu, que'l Tribunal va resolver en próximes feches.

   Foi'l pasáu 24 d'abril cuando'l Conseyu de Ministros acordó recurrir ante'l TC la llei asturiana del 2014, puesto qu'inclúi la regulación del impuestu sobre depósitos bancarios y l'Estáu aprobó esi mesmu impuestu pa tol territoriu nacional.

   El Gobiernu central entiende que'l Principáu d'Asturies sobrepasó les sos sos competencies invadiendo les competencies estatales en materia de Facienda. El Gobiernu esplicó que s'interpunxo'l recursu al nun algamase acuerdu cola Comunidá Autónoma pal so cambiu, dientro del procedimientu previu negociador previstu.