La Comisión Europea presentó esti miércoles una nueva Axenda Europea d'Inmigración pa responder a la crisis nel Mediterraneu, qu'inclúi ente les sos principales novedaes un sistema de cuotes obligatoriu pa distribuyir a los demandantes d'asilu ente tolos Estaos miembru y descargar asina a los países afectaos en primer llínea pola crisis migratoria nel Meditarreu, como Italia, Grecia o Malta.
El repartu de refuxaos ente los países de la UE va basase nuna serie de criterios, sobremanera'l PIB, el tamañu de población, la tasa de paru y los númberos anteriores de asilaos y va tener en cuenta los esfuerzos voluntarios yá realizaos polos Estaos miembros.
Bruxeles anunció que tien previsto amás proponer, a últimos de mayu, un programa de reasentamientu en tola UE pa ofrecer 20.000 places distribuyíes en tolos Estaos miembros pa les persones desplazaes en clara necesidá de protección internacional con una financiación adicional de 50 millones d'euros pal 2015 y pal 2016.
Reinu Uníu --que yá espresó'l so refugu frontal a esta iniciativa-- Irlanda y Dinamarca cuenten con clauses de exención que-yos dexen nun participar nel repartu de refuxaos.
Les cuotes obligatories de solicitantes d'asilu topetaron hasta agora cola oposición radical de los Estaos miembros, qu'aleguen que se trata d'una cuestión qu'afecta a la soberanía nacional. Sicasí, l'agravamientu de la crisis migratoria nel Mediterraneu llevó a dellos países como Alemaña o Francia a cambiar de posición. Otros, como Reinu Uníu o Hungría, caltienen el so refugu.
Foto: - Flickr
