La Comisión Europea aprobó formalmente esti xueves la so propuesta d'imponer a España una multa de 18,93 millones d'euros pola manipulación, por "neglixencia grave", de les estadístiques de déficit y deuda na Comunidá Valenciana per mediu del tapecimientu sistemáticu d'una parte del gastu sanitario. Les irregularidaes, que se prollongaron mientres más de 20 años, namás se corrixeron nel 2012. La multa tovía tienen qu'aprobala agora los ministros d'Economía de la UE.

   Trátase de la primer vez que l'Executivu comuñal sanciona a un Estáu miembru por falsiar les sos estadístiques basándose nes nueves normes de la UE que s'aprobaron nel 2011, de magar el casu de Grecia. Por ello, anque la manipulación del déficit na Comunidá Valenciana prodúxose ente 1988 y el 2011, pol calter non retroactivu de la llexislación la multa refierse namás al periodu 2011-2012. Nesi periodu, el gastu sanitario non rexistrao (les denominaes 'factures nos caxones') ascendió a casi 2.000 millones d'euros.

   Bruxeles tuvo amás en cuenta una serie de "factores atenuantes" que-y llevaron a amenorgar l'importe de la multa (el so valor de referencia inicial yera de 94,65 millones d'euros). En particular, l'Executivu comunitariu consideró que'l tracamundiu de les cifres "nun foi intencional, sinón que se debió a una neglixencia grave d'una entidá qu'actuó pola so cuenta".

   En concreto, el so informe apunta como únicu responsable a la Intervención Xeneral de la Comunidá Valenciana y acúsa-y d'inorar los informes del tribunal de cuentes valencianu y los avisos de la Conselleria de Sanitat.

   Amás, la Comisión valora positivamente que les autoridaes españoles "cooperaron dafechu na investigación" y que se punxo fin "a les irregularidaes". La multa tien asina un calter puramente simbólicu y queda bien lloñe del máximu previstu na llexislación de la UE, que nel casu d'España sería 2.000 millones d'euros (el 0,2% del PIB).