El ministru de Finances griegu, Yanis Varoufakis, refugó esti martes que mientres el próximu Eurogrupu del 11 de mayu llógrese yá un acuerdu sobre'l plan de reformes que la UE esixe a Atenes pa desbloquiar l'últimu tramu de 7.200 millones d'euros del rescate y dixo que la xunta va valir namás pa confirmar los "grandes progresos" qu'al so xuiciu llográronse hasta agora.

   Varoufakis -al que marxinaron del equipu negociador griegu anque formalmente tovía lu dirixe- caltuvo un "discutiniu llargu y constructivu" en Bruxeles col comisariu d'Asuntos Económicos, Pierre Moscovici, pa preparar l'Eurogrupu. De primeres reunióse en París col so homólogu galu, Michel Sapin. El miércoles va alcontrase en Roma col ministru italianu, Pier Carlo Padoan, y el vienres va vese en Madrid al ministru d'Economía, Luis de Guindos.

   "Vamos tener un discutiniu productivu'l 11 de mayu que va confirmar los grandes progresos que se llograron y va ser un pasu más na dirección hacia un acuerdu final", dixo'l ministru griegu nuna corta declaración a la prensa tres la so xunta con Moscovici.

   "Ye importante que los bonos progresos que se realizaron se solidifiquen y xeneren bien rápido pasos socesivos pa cubrir lo que queda de fienda (p'algamar un acuerdu)", defendió Varoufakis. Ello tien que valir, alegó, pa "superar les dificultaes de lliquidez qu'esperimenta Grecia" y tamién p'algamar un nuevu acuerdu cola eurozona que dexe "acabar cola crisis".

   Atenes y la troika negocien de forma intensiva dende'l pasáu xueves -cuando se formalizó'l cambiu del equipu negociador helenu- sobre'l plan de reformes, pero tovía persisten grandes diferencies en cuestiones como la reforma del mercáu llaboral y les pensiones.