La organización terrorista Estáu Islámicu executó a más de 2.100 persones dende que proclamó'l so 'califatu' en Siria en xunu del añu pasáu, según un balance del Observatoriu Siriu pa los Derechos Humanos, qu'analiza les consecuencies del conflictu.

   En concreto, esta organización opositora pudo confirmar la muerte de 2.154 persones a manes d'Estáu Islámicu, 123 d'elles nel últimu mes. L'Observatoriu tarrez que la cifra seya muncho mayor, dao qu'hai cientos de persones desapaecíes y deteníes de los que nun se tien nenguna información.

   El balance inclúi ente les 2.154 víctimes a 1.362 civiles, de los que nueve yeren neños y 19 muyeres. La mayoría d'estos finaos (930) pertenecíen a la tribu Al Shaitaat, afincada na zona rural de Deir al Zor.

   Per otra parte, 137 persones executaes formaben parte de facciones islamistes rivales a Estáu Islámicu como'l Frente al Nusra, vinculáu al Qaeda, mientres que 529 pertenecíen a les fuerces del réxime de Bashar al Assad.

   Amás, Estáu Islámicu tamién executó a 126 de los sos combatientes por "sobrepasar les llendes de la relixón y espiar pa países estranxeros", según un comunicáu del Observatoriu Siriu pa los Derechos Humanos.

   El balance tien en cuenta les muertes cometíes por Estáu Islámicu en situaciones ayenes al combate y recueye casos de decapitación, lapidación o fusilamientu, ente otres formes d'execución. Nun tán incluyíos, sicasí, los mediáticos asesinatos de periodistes y cooperantes estranxeros.

   El grupu terrorista sunín castiga con durez cualquier niciu de disidencia, pero tamién conductes sociales que consideren contraries a la so estricta visión de la 'sharia' o llei islámica. Asina, nos últimos diez meses mató a persones condenaes por blasfemia y sodomía, ente otros delitos sociales.