Les llibreríes de la rexón regalen el día 8 de mayu la obra 'Blimes nueves, bringas novas', con cuentos y dibuxos realizaos por escolinos

La Selmana de les Lletres llega anguaño con un programa d'actos centráu na lliteratura escolar y que tien l'oxetivu d'axuntar presente y porvenir lliterariu. El lema Semar palabres, texer futuru va presidir los actos institucionales, conciertos, recitales, presentaciones de llibros y actividaes infantiles ente’l 2 y el 10 de mayu.

La Selmana de les Lletres Asturianes empieza'l sábadu 2 de mayu cola realización n'horariu de mañana y tarde de visites guiaes en llingua asturiana al Muséu de Belles Artes (itinerarios «Maestros de la Pintura Universal» y «Maestros de la Pintura Asturiana»). Amás, a les 19.00 hores va tener llugar n'A Caridá (El Franco) el Homenaxe ás nosas lletras, un actu nel que va facese una llectura pública institucional de testos lliterarios en gallego-asturianu y que va cuntar cola participación de bien d’alcaldes de la zona. Preséntase amás el sestu númberu de Trabatel. Revista eonaviega de lliteratura, que va regalase a los asistentes. L'homenaxe ciérrase con un conciertu de la Banda de Gaites El Trasno.

La participación de la comunidá educativa va ser una constante a lo llargo de la Selmana. El llunes día 4 el protagonismu va corresponder al alumnáu de Primaria y Secundaria de Grau, que va tomar parte nun actu poético-musical na Capiella de los Dolores de la localidá. Otra manera, l'actu escolar institucional de la Selmana de les Lletres va celebrase nel Colexu Públicu Manuel Martínez Blanco (Xixón) el vienres 8 de mayu a les 12 hores, y nél entregaránse los premios artísticos y lliterarios convocaos por cuenta de la Selmana de les Lletres.

Los escolinos son tamién los protagonistes d'una obra que'l Gobiernu del Principáu editó espresamente pa esta ocasión: Blimes nueves, bringas novas, qu'incluye los cuentos y dibuxos ganadores del XX Certame de Creación Artística/Lliteraria pa centros educativos. Esti llibru va regalase'l mesmu 8 de mayu (Día del Llibru Asturianu) a los compradores d'obres n'asturianu o gallego-asturianu en 56 llibreríes de la rexón. 

El programa incluye otres actividaes:

• Conciertu del grupu Petit Pop, que va celebrase’l martes 5 de mayu a les 11.00 hores en Llaboral Ciudá de la Cultura. Les entraes pa esta actividá tán yá escosaes.
• Llectura siguida de la obra L’inxeniosu fidalgu don Quixote de la Mancha, primer versión n'asturianu de la gran obra de Miguel de Cervantes. Miércoles, 6 de mayu, a les 12.00 hores, nel Paraninfu de la Universidá d'Uviéu.
• La III Feria del Llibru y Discu n’asturianu, entamada en collaboración col Conceyu d'Avilés y l'Asociación de Llibreríes del Principáu d'Asturies, que va acoyer ente los díes 7 y 10 de mayu presentaciones de llibros, sesiones de cuentacuentos y alcuentros lliterarios. La Feria va tar instalada nel edificiu de l'Antigua Pescadería Municipal d'Avilés.
• La presentación a lo llargo de la Selmana de los llibros ganadores de los cinco premios lliterarios n'asturianu del 2014.

Coles mesmes, la Xunta Xeneral del Principáu d'Asturies va entamar un actu institucional de celebración de la Selmana el martes 5 de mayu, a les 12.00 hores, con una llectura pública de testos n'asturianu na que va participar l'alumnáu del IES Alto Nalón, centru de Secundaria con mayor porcentaxe d'elección de l'asignatura optativa de Llingua Asturiana y Lliteratura nel presente curso.

La Selmana de les Lletres Asturianes ye un eventu participativu nel que s’axunten lo lliterario, lo festivo y lo institucional. A esta celebración entamada pol Gobiernu asturianu xúnense múltiples instituciones, como la Xunta Xeneral del Principáu d'Asturies, la Universidá d'Uviéu y los conceyos; y tamién participen de manera especial los centros educativos, los llibreros, los editores, los escritores o los mesmos medios de comunicación.