La Guardia Civil desarticuló una trama dedicada a la venta d'armes nel mercáu negru col arrestu de siete persones y la captura d'un centenar d'armes y 21.000 cartuchos. Ente'l material que vendíen alcontrábense dende armes de guerra como fusiles d'asaltu o subfusiles hasta otru tipu d'armes prohibíes como 'bastones escopeta' o 'llaveru pistola', según informó la Guardia Civil.

   Dende l'Institutu Armáu alvierten que "dada la condición orixinal d'armes de guerra de munches d'elles, lo mesmo pol so calibre como pola so capacidá pa facer fueu automático (ametrallador), la rehabilitación d'esti tipu d'armes y el so comerciu illegal suponen un riesgu máximu pa la seguridá ciudadana, hasta pol so posible esvíu a organizaciones terroristes".

   "Les posibles vinculaciones ente'l tráficu d'armes y les organizaciones terroristes, faen que la llucha contra esta amenaza seya una de les prioridaes lo mesmo de la estratexa de seguridá nacional como de la Unión Europea", añaden. El Centru d'Intelixencia contra'l Terrorismu y el Crime Entamáu (Citco) detectó yá cerca de 200 nicios de conexón ente'l terrorismu yihadista y grupos dedicaos a la delincuencia entamada, según los datos colos que cuenta'l Ministeriu del Interior.

   Según dixo unu de los responsables d'esti operativu, "la relevancia nun vien dada namás pol importante númberu d'armes confiscaes, sinón por esmantelar el taller clandestín polo que s'evitó qu'estes armes pasaren per esti taller llegando al mercáu illegal". En relación a la "posible esviación" d'armes a la yihad recordó que "al contrariu qu'ETA, que tenía un aparatu loxísticu bien potente, los terroristes yihadistes qu'operen n'Europa y tienen convencimientu de llevar a cabu un atentáu nun tienen eses armes polo que recurren al mercáu negru p'acceder a elles".

Foto: Guardia Civil.