El próximu sábadu 2 de mayu Darréu entama nel Centru Social La Llume (Cai Nava 1, Xixón), una xornada cola que siguir afondando na problemática de la emigración forciada de la mocedá, dientro de la campaña permanente escontra una cuestión qu’obliga a marchar d’Asturies a miles de mozos y moces cada añu.

Na mesma va entamase con una introducción a cargu de la Mocedá d’Izquierda Soberanista afondando na perspeutiva moza,  pa después cuntar col profesor y economista David M. Rivas, que va facer un repasu sobre una de les cuestiones consideraes clave na situación económica y social de l’Asturies d’anguaño:  el procesu de “reconversión industrial” y los sos efeutos.

Posteriormente va desendolcase una Xinta Popular nel mesmu CS La Llume, pa depués proyeutar “Desenfocados”, un reportaxe de Javier Bauluz nel que s’afonda na desllocalización –o intentos d’ello- d’empreses multinacionales n’Asturies dende’l testimoniu de dellos trabayadores.